CNN ka hedhur dritë mbi operacionin e vrasjes së Nemesio Oseguera Cervantes, i njohur si ‘El Mencho’.
Pas disa viteve përndjekje, më 20 shkurt autoritetet meksikane morën një informacion konkret për vendndodhjen e kreut të Cartel Jalisco Nueva Generacion.
Hetimi mbi rrjetin i kishte çuar te një person kyç që mund të ndihmonte për të hyrë në strehën e tij. Bëhet fjalë për një “njeri të besuar”, konkretisht njëra prej të dashurave të tij, – sipas sekretarit meksikan të Mbrojtjes, Ricardo Trevilla Trejo.
Ajo u gjurmua derisa u lokalizua strehimi i trafikantit në periferi të Tapalpës.
Forcat speciale meksikane dhe Garda Kombëtare kaluan më pas në veprim. Për të shmangur ngritjen e dyshimeve, misioni u krye kryesisht nga forcat tokësore me mbështetje të kufizuar ajrore nga helikopterët.
Sipas analizës së CNN mbi videot në rrjetet sociale, disa njësi të ushtrisë meksikane ishin të pranishme në qendër të Tapalpës të dielën në mëngjes.
Presidentja Claudia Sheinbaum tha se SHBA ndau informacione inteligjence që ndihmuan operacionin, por nuk dërgoi forca tokësore.
Trupat meksikane vendosën një perimetër rreth kompleksit dhe më pas u afruan.
El Mencho dhe ekipi i tij i sigurisë qëndronte në një zonë pyjore ku ishin ngritur disa banesa në formë kompleksi, pak më shumë se tre milje në jugperëndim të Tapalpës. Vendi, i njohur si Cabañas La Loma, shtrihej në fund të një rruge të gjatë dhe të izoluar.
Cabañas La Loma u sanksionua nga Departamenti i Thesarit i SHBA-ve në vitin 2015 dhe sërish në vitin 2017 për ofrimin e ndihmës materiale për aktivitetet e trafikimit të drogës.
Pamje të verifikuara nga CNN tregojnë persona me uniformë dhe automjete të blinduara që avancojnë në një shpat drejt Cabañas La Loma.
Në pamjet e filmuara në rrugën hyrëse, dëgjohen të shtëna automatike, ndërsa një video e tretë e regjistruar në të njëjtën kohë tregon tym të zi të dendur që ngrihet nga zona.
Gjatë shkëmbimit të zjarrit u vranë 8 anëtarë të kartelit dhe u plagosën 2 ushtarë.
Oseguera dhe disa nga zëvendësit e tij më pas u arratisën në një zonë pyjore aty pranë, duke lënë pas një grup “me një sasi të madhe armësh” që vazhdoi të luftonte.
Ndërsa disa nga trupat meksikane mbetën për t’u përballur me grupin në kabinë, një ekip i Forcave Speciale u shkëput në ndjekje të Osegueras, të cilin e gjetën të fshehur në një zonë me bimësi të dendur.
Pas një përplasjeje tjetër me armë, ekipi i Forcave Speciale arrestoi liderin e kartelit dhe dy truprojat e tij. Të tre ishin plagosur rëndë dhe u përcaktua se duhej të evakuoheshin për të mbijetuar.
Së bashku me një ushtar të plagosur, tre anëtarët e kartelit u vendosën në një helikopter që supozohej t’i çonte në një spital në qytetin e afërt të Guadalajara-s.
Kur të tre vdiqën gjatë fluturimit, autoritetet vendosën të ndryshonin destinacionin, nga frika e një reagimi të dhunshëm në Guadalajara, ku karteli ka ndikim të madh. Helikopteri u devijua drejt Aeroportit Ndërkombëtar të Morelias, ku një avion i Forcave Ajrore po priste për t’i çuar në Mexico City.
Lajmi për vdekjen e Osegueras e zhyti një pjesë të madhe të Meksikës në kaos, pasi forcat e kartelit ndërmorën një valë dhune hakmarrëse.
Bandat ngritën barrikada të zjarrta në rrugë dhe u përfshinë në përplasje me ushtrinë. Linjat ajrore pezulluan fluturimet drejt rajonit.
SHBA u bëri thirrje shtetasve të vet të shmangin lëvizjet.
Gjatë kaosit, janë vrarë 25 efektivë të policisë ushtarake dhe të Gardës Kombëtare.
Operacioni ndodhi në një moment presioni mbi Meksikën. Me Trump që kërcënonte me ndërhyrje ndërkufitare, Sheinbaum dëshiroi të tregonte se po godiste me forcë bandat e drogës.
Situata do ketë pasoja duke pasur parasysh afërsinë e zhvillimit të Kupës së Botës në futboll. Guadalajara do të presë ndeshje këtë verë, në një ngjarje që pritet të sjellë përfitime ekonomike për Jaliscon.
Për shumë kritikë brenda vendit, Sheinbaum do ishte dashur të tregohej më e kujdesshme që të mos trembte turistët.
SHBA e kishte klasifikuar trafikantin e vrarë si terrorist global dhe kishte vendosur shpërblim prej 15 milionë dollarësh për kapjen e tij.
