Koreja e Veriut konfirmoi për herë të parë të hënën se ka dërguar trupa për të luftuar në krah të Rusisë në Ukrainë.
Agjencia shtetërore të lajmeve në Korenë e Veriut. KCNA, njoftoi se njësitë koreano-veriore kanë ndihmuar Moskën në rimarrjen e kontrollit të territorit rus të pushtuar nga forcat ukrainase, veçanërisht në rajonin perëndimor të Kurskut
KCNA, thekson se dislokimi i mijëra ushtarëve nga Koreja e Veriut i dha Rusisë një avantazh vendimtar në fushën e betejës.
Agjencia shtoi se përfundimi i suksesshëm i betejës për Kurskun demonstroi “nivelin më të lartë të strategjisë së miqësisë” mes dy vendeve.
Në një deklaratë të lëshuar nga Kremlini, presidenti rus Vladimir Putin falënderoi personalisht Korenë e Veriut dhe liderin e saj Kim Jong Un.
“Ne gjithmonë do të nderojmë heronjtë koreanë që dhanë jetën për Rusinë, për lirinë tonë të përbashkët, krahas vëllezërve të tyre rusë në armë”, tha Putin.
Ai përshëndeti veprimet e trupave koreano-veriore si një shprehje të solidaritetit, drejtësisë dhe miqësisë së vërtetë.
Vendimi për të dërguar trupa, sipas Komisionit Qendror Ushtarak të Partisë së Punëtorëve të Koresë së Veriut, u mor në kuadër të traktatit gjithëpërfshirës të partneritetit strategjik të nënshkruar mes Kim Jong Un dhe Vladimir Putin një vit më parë.
Njësitë e Koresë së Veriut, sipas KCNA, luftuan me “heroizëm dhe trimëri” të njëjtë sikur të mbronin atdheun e tyre.
Nga ana tjetër, Ukraina ka mohuar pretendimet ruse, duke deklaruar se trupat e saj janë ende aktive në disa pjesë të territorit rus.
Ndërkohë, Departamenti Amerikan i Shtetit dënoi vendosjen e trupave koreano-veriore në Ukrainë, duke akuzuar Rusinë për shkelje të rezolutave të Këshillit të Sigurimit të Kombeve të Bashkuara.
Uashingtoni kërkoi përfundimin e çdo bashkëpunimi ushtarak mes Moskës dhe Phenianit.
j.l./ dita
