Korrupsioni me patentat i ka kushtuar shtrenjtë Avni Dacit, 56-vjeç, i cili është arrestuar nga Policia e Dibrës, pasi akuzohet se i kishte marrë deri në 50 mijë lekë një 32-vjeçari, duke i premtuar se do ta pajiste me leje drejtimi, pa përfunduar praktikën siç e parashikon ligji.
Sipas njoftimit zyrtar të policisë vendore, ka qenë një indicio dhe më pas përgjimi që kanë zbuluar se i dyshuari ka marrë paratë nga shtetasi J. M., 32 vjeç, me premtimin se do ta regjistronte ne autoshkollën e shokut të tij dhe do ta pajiste me lejen e drejtimit, pa përfunduar praktikën që parashikohet ligjërisht. I ndaluari e mohoi akuzën, teksa hetimet po vijojnë ende. Materialet procedurale i kaluan Prokurorisë pranë Gjykatës së Shkallës së Parë Dibër, për veprime të mëtejshme.
