Në prag të 15-vjetorit të pavarësisë së Kosovës, 17 shkurt, ambasada e Kosovës në Tiranë organizoi një aktivitet ku morën pjesë përfaqësues të lartë të shtetit. I pranishëm ishte dhe presidenti i Republikës së Shqipërisë, Bajram Begaj i cili vlerësoi arritjet e Kosovës në këto 15 vite duke dëshmuar se është një faktor stabiliteti për paqe.
“15 vite Kosovë e pavarur, përmbushje e amanetit të Ibrahim Rugovës dhe Adem Jasharit. Republika e Kosovës një shtet sovran dhe i pavarur ka demonstruar pjekurinë e saj. I demonstroi botës se ishte dhe do të jetë faktor stabiliteti për paqen. Ne jemi një komb i ndarë në dy shtete, humbjet dhe fitoret i kemi të përbashkëta. Do të intensifikojmë përpjekjet për njohje të mëtejshme të pavarësisë.”, tha Begaj
Ndërsa ambasadori i Kosovës në Shqipëri Skënder Durmishi u shpreh nuk ka asnjë pengesë mes dy vendeve. “Kemi rreth 180 marrëveshje ndërshtetërore, të gjitha fushat e bashkëpunimit janë të mbuluara me infrastrukturë dhe tashmë nuk ka asnjë pengesë. Në politikën e jashtme të dy vendet ndjekin parime identike. Jemi mirë kur është mirë Shqipëria. Për ne është mik kushdo që e lartëson emrin e Shqipërisë”, tha Durmishi.
m.b./dita
