Armir Rrahmani doli në krah të trajnerit Alain Giresse me statusin e kapitenit të “dardanëve”. Kampioni i freskët i Serisë A foli hapur, duke e pranuar se vetëm fitorja e kthen realisht në lojë Kosovën për kualifikimin.
Trajneri i Kosovës, u mundua të shmangte presionin nga lojtarët e tij në konferencën për shtypin në prag të sfidës me Rumaninë, që do të zhvillohet këtë të premte, në “Fadil Vokrri”. Francezi e bëri të qartë se një rezultat negativ e largon thuajse përfundimisht Kosovën nga objektivi final, që është vendi i dytë.
“Nesër kemi ndeshje shumë të rëndësishme përballë Rumanisë. Është kundërshtari ynë kryesor për kualifikimin. Rumania ka gjashtë pikë dhe për ne është e rëndësishme të fitojmë për të qenë ende në garë për objektivin final”.
Rashani mungon, Zhegrova në dyshim: “Kemidy lojtarë me probleme fizike, njëri është jashtë zyrtarisht, tjetri ende nuk është mungesë e sigurt. Zhegrova ndoshta edhe mund të luajë. Është lojtar shumë i rëndësishëm. Pse s’i kemi zëvendësuar? Jemi në një periudhë pushimesh, nuk mund të marrim lojtarë të tjerë që janë me pushime në këtë moment”.
Zgjedhjet në mesfushë: “Nëse lojtarët e mesfushës nuk kanë pasur shumë minuta, kjo s’do të thotë që nuk janë stërvitur rregullisht. Do të tentojmë të përgatitemi sa më mirë dhe të bëjmë zgjedhjet e duhura”.
Motivimi dhe presioni: Lojtarët e janë të vetëdijshëm për rëndësinë e ndeshjes dhe nuk duhet t’i vëmë nën presion. Duhet të kenë motivimin e duhur kur të futën në fushë dhe shpresoj ta fitojmë këtë ndeshje”.
“Sigurisht që do të bëjmë më të mirën për të fituar. Është një ndeshje me një kundërshtar të drejtpërdejtë dhe duhet t’i bëjmë pyetje vetes së çfarë duam. Është një ndeshje që do të vendosë shumë. Me një fitore të mundshme, Rumania do të shkëputej, kështu që nuk duhet ta lejojmë. Shpresoj që me mbështetjen e tifozëve t’ia dalim. Nëse mposhtemi, jemi 99% jashtë”, tha Rrahmani.
Pa frikë ndaj Rumanisë: “Nuk kemi frikë, sepse kemi luajtur me skuadra dhe futbollistë edhe më të fortë. Frika e vetme është a jemi ne futbollistët e duhur dhe në momentin tonë për të fituar”.
Reflektimi për gabimet: “A kemi reflektuar për gabimet e bëra? E dimë që duhet të kishim gjashtë pikë. Në ndeshjen me Izraelin, kishim shanse për ta mbyllur ndeshjen në fund. Andorra, për shembull, pati vetëm një shans me ne, duhet të kishim bërë më mirë. Kemi bërë shumë gabime dhe kemi marrë dy rezultate jo të mira”.
Lojtarët e Rumanisë: “Njoh lojtarët që luajnë te Pisa, por sigurisht që njoh edhe sulmuesin e tyre kryesor, Puscas i Genoas është shumë i fortë”.
