Gjykata e Shkodrës nuk u bind për provat në aktet e dosjes që i çoi Prokuroria, për të arrestuarin e operacionit të koduar “Krateri”, në Kastrat të Malësisë së Madhe, disa ditë më parë. Nesti Velaj, që mbante edhe identitetin e dytë Ernet Veshtaj, është njohur me masën e sigurisë “arrest shtëpie” nga Gjykata e Shkallës së Parë, në një seancë me dyer të mbyllura. Sipas Gjykatës, nuk ka prova të mjaftueshme se 52-vjeçari të jetë organizatori i plantacionit të drogës në Malësinë e Madhe, ku ishin ngritur 27 serra dhe mbjellë 8 mijë kubikë kanabis sativa, gati për kultivim në parcela. Veshtaj gjithashtu ka mohuar akuzat ndaj tij, duke u shprehur se nuk ka asnjë lidhje me 27 serrat e zbuluara nga operacioni i policisë. Nga ana tjetër, prokuroria u shpreh e bindur se i dyshuari është i implikuar bashkë me persona të tjerë, duke hapur në zonën e kraterit të inerteve, te “Badra e Mehajve”, edhe parcela të vogla për të kultivuar kubikët.
Prokuroria kërkoi masën e sigurisë “arrest me burg”, por Gjykata vendosi “arrest shtëpie” për shkak të mungesave të provës në ketë faze fillestare të hetimit të çështjes. Plantacioni i drogës u zbulua tre ditë më parë në Malësi të Madhe ku ishin ngritur 27 serra, brenda të cilave ishin kultivuar në kubikë rreth 8 mijë fidanë të dyshuar me kanabis, gati për t’u mbjellë në tokë. Fidanët ishin 20 metra në thellësi të kraterit, që ka shërbyer për marrje inertesh, në vendin e quajtur “Badra e Mehajve”, në Koplik.
Nga operacioni antikanabis i koduar “Krateri”, nisi hetimi edhe për 3 punonjës të Bashkisë Malësi e Madhe, Gjovalin Gjekaj, drejtori i Pyjeve dhe punonjësit e Ujësjellësit, Roland Gjekaj (specialist) dhe Arben Hysaj (hidraulik). Prokuroria i la për hetim në gjendje të lirë dhe në këtë masë ra dakord edhe gjykata. Ata mbulonin zonën ku janë gjetur fidanët narkotikë. Nga pamjet duket se serrat janë në një ambient të hapur, ku janë dërguar bimët e kanabisit dhe sende që shërbejnë për rritjen e tyre. Gjatë kontrollit në banesën e organizatorit të dyshuar, u gjetën 3 armë gjahu, municion luftarak dhe 5 armë të ftohta (thika) që i mbante pa leje, të cilat u sekuestruan në cilësinë e provës materiale.
