Gjykata e Apelit konfirmoi dje masat e sigurisë ‘arrest me burg’, ndaj 3 personave të akuzuar për shfrytëzim prostitucioni në 2 lokale dhe një hotel në qytetin e Fierit. Besiko Molishtari, 71 vjeç dhe Nesti Golemaj, 69 vjeç, që ishin pronarë të një lokali në lagjen ‘Kastriot’ dhe që ishte kthyer në fole prostitucioni, kërkuan zbutjen e masës së sigurisë në ‘arrest shtëpie’, që nuk u pranua nga Gjykata e Apelit, duke e hedhur poshtë pretendimin e palës mbrojtëse, për shkak të gjendjes shëndetësore dhe moshës së klientëve të tyre. Edhe Naxhie Aliaj, 63 vjeçe, u la në burg. Ndonëse lokali i tij ishte përshtatur në ambient për ushtrim prostitucioni, Aliaj pretendon se nuk është vërtetuar vepra penale, ndaj dhe kërkonte zëvendësimin e masës së sigurisë nga ‘arrest në burg’, në ‘arrest shtëpie’.
Por Gjykata e Apelit vendosi konfirmimin e masës së sigurisë, që kishte dhënë më herët Gjykata e Rrethit Gjyqësor të Fierit. I vetmi që është lënë në arrest shtëpie është Tajar Hysenaj, 69 vjeç, pronar i një tjetër hoteli, ku dyshohet se ushtrohej prostitucion. Nga hetimet e kryera rezultoi se 4 pronarët bashkëpunonin me njëri-tjetrin, duke i kthyer ambientet edhe në një bazë për gjetje klientësh dhe ushtrim e shfrytëzim prostitucioni. Aktiviteti dyshohej se kryhej që prej muajit maj të vitit të kaluar dhe pas disa muajsh me përgjime dhe survejime, u bë ndërhyrja operacionale e bluve vendorë.
