Policia e Shqipërisë dhe Policia e Kosovës, kanë vijuar patrullimet e përbashkëta në qytetet bregdetare në kuadër të sezonit turistik, duke rritur sigurinë e pushuesve vendas dhe të huaj.
Bashkëpunimi mes dy vendeve, vjen ne zbatim të Memorandumit të Bashkëpunimit, të lidhur ndërmjet Policisë Rrugore të Shqipërisë dhe asaj të Kosovës, që prej fillimit të muajit gusht.
Objektivat madhorë të patrullimeve të përbashkëta, bashkërendimi i burimeve policore dhe atyre logjistike, për parandalimin e aksidenteve dhe për rritjen e parametrave të sigurisë rrugore.
Këto objektiva synohet të përmbushen përmes: këshillimit, orientimit dhe informimit të qytetarëve, turistëve dhe pushuesve, marrjes së masave për lehtësimin e qarkullimit rrugor dhe për shmangien e radhëve të gjata, si dhe përmes konstatimit me mjete të teknologjisë bashkëkohore, dhe ndëshkimit konform ligjit, të shkelësve të rregullave të qarkullimit rrugor.
Policia Rrugore apelon për qytetarët, turistët dhe pushuesit që të respektojnë rregullat e qarkullimit rrugor, pasi vetëm në këtë mënyrë mbrohet jeta dhe shëndeti i çdo përdoruesi të rrugës. Gjithashtu, garanton reagim të menjëhershëm ndaj çdo kallëzimi për shkelje të këtyre rregullave.
