Një 35-vjeçare shqiptare është vrarë në mes të rrugës me plumb në kokë, teksa po kthehej nga puna në provincën Casterlfiorentino të Firences në Itali.
Ngjarja e rëndë është shënuar rreth orës 20:00 të së enjtes.
Bëhet fjalë për 35-vjeçaren Klodiana Vefa, nënë të dy fëmijëve që sipas informacioneve nuk ishte ndarë ligjërisht nga bashkëshorti, por kishin pasur probleme.
Edhe në rrjete sociale, Vefa e tregonte hapur gjendjen e saj emocionale.
“Nëse një burrë pret që një grua të jetë një engjëll në jetën e tij, ai së pari duhet të krijojë parajsën për të. Sepse engjëjt nuk jetojnë në ferr”, ka shkruar në rrjetet sociale Klodiana Vefa.
Klodiana ishte ndarë nga bashkëshorti i saj në Shqipëri, me të cilin kishte dy fëmijë që tani janë 17 dhe 14 vjeç. Megjithatë, ndonjëherë ai ende flinte në shtëpinë e tyre.
“E njoh shumë mirë veten, jam prej betoni dhe xhami. Disa gjëra nuk më prekin, të tjera më shkatërrojnë”, shkruante ajo krah një postimi në Instagram më 17 shtator.
Duke lundruar nëpër postimet e saj, Klodiana dukej se jetonte për dashurinë dhe me të.
“Nuk erdha këtu për qejf, por duke rrezikuar jetën e të dyve ne”, ka shkruar ajo. “Dashuria të çon gjithmonë në befasi: ka nga ata që e jetojnë atë me pasion dhe me gjithë forcën e tyre”. Dhe përsëri shkruante: “Nuk ka asnjë racë, fe, asnjë klasë shoqërore, asnjë ngjyrë, asnjë orientim seksual që të bën më të mirë se dikush tjetër. Të gjithë jemi të denjë për dashuri”.
Klodiana publikonte foto, në të cilat shfaqej me fëmijët e saj duke i përqafuar.
“Shpresoj të të shoh gjithmonë kaq të lumtur. Nëna është gjithmonë nënë”, lexohet në një nga këto foto ku portretizohet vajza e saj në festën e ditëlindjes.
“Në fund fare të gjithë themi se gjithçka do të shkojë mirë kur asnjë nga ne nuk e di çfarë fundi do të kemi”, shkruhej në postimin e fundit të gruas së vrarë.
Mbrëmjen e së enjtes, Alfredi, bashkëshorti i saj 45-vjeçar raportohet se i shkoi në shtëpinë ku gruaja jetonte me fëmijët dhe mes tyre nisi një zënkë. Më pas dolën jashtë në rrugë.
Pak çaste më vonë u dëgjuan 3 të shtëna. Një prej plumbave i mori jetën Klodianës, ndërsa autori i dyshuar u largua me makinë nga vendi i ngjarjes.
Ishin fëmijët dhe familjarët që e gjetën të pajetë Klodianën.
Autoritetet italiane aktualisht kanë shpallur në kërkim bashkëshortin e saj. Nga raportimet e deritanishme në mediat fqinje thuhet se çifti po ndahej e se mes tyre kishte pasur debate herë pas here, me në qendër xhelozinë e Alfredit.
Klodiana ishte me origjinë nga Fushë Kruja dhe jetonte prej rreth 17 vitesh në Itali.
j.l./ dita
