Gjykata Kushtetuese rrëzoi padinë e deputetëve të opozitës për shpalljen anti-kushtetues të marrëveshjes për Marinën e Jahteve në Durrës, por pa i hyrë themelit të çështjes.
Gjithçka është zbuluar sot nga vendimi i zbardhur në faqen zyrtare të Gjykatës Kushtetutuese.
Tetë nga nëntë gjyqtarët kanë vlerësuar se nuk kanë tagër për të shqyrtuar ligjin ratifikues të marrëveshjes, e cila i hap rrugë shndërrimit të Portit Tregtar të Durrësit në një kompleks rezidencial.
Vendimi i Gjykatës Kushtetuese në favor të marrëveshjes me biznesmenin saudit Mohamed el Alabbar, është marrë në 14 qershor të këtij viti dhe u shpall ditën e sotme.
Sipas vendimit, gjashtë gjyqtarë, Holta Zaçja, Gent Ibrahimi, Elsa Toska, Sandër Beci, Marjana Semini dhe Ilir Toska, janë shprehur kategorikisht kundër kërkesës së deputetëve opozitarë për shpalljen antikushtetuese të marrëveshjes me Alabar.
Dy, Marsida Xhaferllari dhe Fiona Papajorgji ishin kundër, por me argument ndryshe nga pjesa tjetër. E vetmja gjyqtare që ka dalë kundër marrëveshjes dhe që ishte pro shpalljes anti-kushtetuese të saj ishte gjyqtarja Sonila Bejtja.
Në mendimin e pakicës, Bejtja mban qëndrim se Gjykata Kushtetuese ka tagrin për të shqyrtuar ligjin që ka ratifikuar Marrëveshjen Ndërkombëtare, pasi ajo tashmë ka hyrë në rendin kushtetues shqiptar.
j.l./ dita
