Shqipëria është një ndër tre shtetet e rajonit që deri tani nuk ka asnjë të dyshuar me linë e majmunit. Organizata Botërore e Shëndetësisë e shpalli emergjencë globale, por anëtari i Komitetit te Ekspertëve për këtë sëmundje Artan Simaku thotë se nuk ka vend për panik.
“Për vendin tonë nuk ka fare stres dhe panik as vend për alarm. Shumica e rasteve janë shfaqur në kontinentin Europian dhe shumica absolute e tyre janë shfaqur në grup të popullatës me sjellje të caktuara. Risku për Shqipërinë është i ulët. Në rajonin tonë kemi tre vende që nuk kanë asnje të dyshuar, Shqipëri, Kosovë dhe Mali Zi ndërsa në shtete te tjera 5 raste janë në Serbi dhe 1 në Bosnje Hercegovinë.”
Lija e majmunit transmetohet përmes kontaktit të ngushtë të infektuarin. Nis me shenja të njëjta si lija e dhenve, por mënyra sesi përparon ndihmon mjekët për ta diferencuar prej saj.
“Transmetimi është me kontakt të ngushtë, kontakt intim seksual, lëkurë me lëkurë dhe nga sendet që ka përdorur personi i sëmurë. Risku i transmetimit është shumë i ulët. Pavarësisht se nis si varieçla ose lija e dhenve ka karakteristika dalluese. Mjekët janë të familjarizuar me linë e dhenve dhe me një vëzhgim kryhet diagnoza diferenciale.”
Në varësi të situatës epidemiologjike Organizata Botërore e Shëndetësisë do të furnizojë shtetet me vaksinën e lijës së zezë e cila mendohet se krijon mbrojtje dhe ndaj lijës së majmunit. Popullata në Shqipëri e ka marrë këtë vaksinë deri në fillim të viteve 80.
“Përdorët dhe për të parandaluar dhe për personat që kanë pasur kontakt të ngushtë. Të gjithë personat e lindur deri në vitet 80 e kanë kryer vaksinën për lijën e zezë dhe kanë një farë mbrojtje.”
Lija e majmunit nuk është një sëmundje e re, por mënyra e përhapjes së saj shqetësoi autoritetet shëndetësore. Organizata Botërore e Shëndetësisë tre ditë më parë aktivizoi alarmin në nivelin e saj të lartë dhe shpalli virusin emergjencë të shëndetit publik me shqetësim ndërkombëtar./ABCNEWS
a.m/dita
