Lirohet nga burgu ish-ministri Saimir Tahiri, do të kryejë pjesën tjetër të dënimit në shtëpi

Lirohet nga qelia ish-ministri i Brendshëm Saimir Tahiri.

Gjykata e Elbasanit, e kryesuar nga gjyqtarja Matilda Fetahu dhe Prokurori Mustafa Turku shpallën vendimin që Tahiri ta kryejë pjesën e mbetur të dënimit në shtëpi, 1 vit e 8 muaj.

Ai u lirua me kusht, pasi rezultoi se e kishte kryer pjesën më të madhe të dënimit, në shërbim prove dhe në qelitë e dy burgjeve.

Avokati i ish-ministrit paraqiti epikrizë mjekësore që klienti i tij nuk duhet të qëndrojë në burg.

Gjatë seancave të mëparshme gjyqësore, Tahiri kërkoi ulje të dënimit me 1 vit e 6 muaj burg pasi pretendoi se gjatë periudhës kur ai ka kryer shërbimin e provës ka shlyer 1.6 vjet nga dënimi që shqiptoi Gjykata e Apelit.

Më 4 shkurt 2022, Apeli i Gjykatës Kundër Krimit të Organizuar dhe Korrupsionit pas një seance maratonë, dënoi Tahirin me 5 vite burg për ‘Shpërdorim të detyrës’.

Por me gjykim të shkurtuar dënimi u ul në 3 vite e 4 muaj burgim. Tahiri u dënua vetëm për “Shpërdorim detyre” duke i ‘shpëtuar’ akuzave “Korrupsion të zyrtarëve të lartë”, “Trafik të lëndëve narkotike kryer në bashkëpunim” dhe “Grup të strukturuar kriminal”.

Për ish-ministrin janë dy ekspertiza mjeko-ligjore, që thonë se nuk mund ta vazhdojë më dënimin në qeli.

Në njërën prej tyre, thuhet se Tahiri ka probleme, pasi ka qëndruar për një periudhë në spitalin e burgut për shkak të një rrëzimi që ka pasur gjatë kur ka qenë në ajrim.

Ndërsa në akt ekspertizën e dytë shpjegohet se një familjare e ish-ministrit nuk është në gjendje të mirë shëndetësore dhe se nuk ka kush të kujdeset për fëmijët.

j.l./ dita