Mbledhja e kabinetit izraelit u zhvillua në një atmosferë veçanërisht të rëndë të dielën (24 dhjetor) pasi 14 ushtarë humbën jetën brenda një periudhe 24-orëshe.
“Është një mëngjes i vështirë pas një dite të vështirë”, tha kryeministri izraelit Benjamin Netanyahu.
“E gjithë qeveria dhe populli i Izraelit dërgojnë ngushëllimet tona për familjet e heronjve që ranë në luftë për shtëpinë tonë. Kjo luftë kërkon një çmim të rëndë nga ne , por ne nuk kemi zgjidhje tjetër veçse të vazhdojmë të luftojmë”, theksoi ai.
Duke iu referuar më pas telefonatës që pati të shtunën, ai mohoi njoftimet se presidenti amerikan Joe Biden i kishte bërë presion me sukses që të mos kryente një sulm parandalues ndaj organizatës terroriste shiite Hezbollah.
Netanyahu tha se foli me Biden dhe shprehu vlerësimin e tij për qëndrimin e SHBA në Këshillin e Sigurimit të Kombeve të Bashkuara .
“I thashë Bidenit se do të luftojmë derisa të kemi fitore totale, sado kohë të duhet. SHBA-të e kuptojnë këtë”, shpjegoi ai.
“Ka pasur raporte që SHBA-të na kanë penguar dhe po na pengojnë të kryejmë operacione në rajon. Kjo nuk është e vërtetë. Izraeli është një vend sovran. Vendimet tona për luftën bazohen në konsideratat tona operacionale, jo në presionet e jashtme”,këmbënguli Netanyahu.
Wall Street Journal raportoi dje se Izraeli kishte “ngritur” avionë luftarakë për të nisur një sulm të madh parandalues kundër Hezbollahut në Liban katër ditë pas sulmit terrorist të Hamasit të 7 tetorit, por Biden e bindi Netanyahun që të mos vepronte në minutën e fundit.
a.c./dita
