Policia ka zbardhur 2 raste të vjedhjes së shumave të konsiderueshme të parave, në një banesë në Divjakë dhe në një lokal në Lushnjë.
Sipas autoriteteve policore, në Divjakë, 3 autorët e dyshuar të vjedhjes së një shume parash në një banesë, u proceduan në gjendje të lirë, për shkak të moshave. Bashkëpunëtori i tyre, gjithashtu i mitur, u shpall në kërkim, ndërsa në Lushnje, u arrestua 34-vjeçari që vodhi një shumë parash, në një lokal.
“Si rezultat i veprimeve të menjëhershme dhe profesionale hetimore, për 2 raste vjedhjesh të denoncuara përkatësisht në komisariatet e Policisë Divjakë dhe Lushnjë, u bë i mundur identifikimi dhe procedimi penal i autorëve të dyshuar të këtyre rasteve. Në Divjakë, u referuan materialet në Prokurori ku nisi procedimi në gjendje të lirë për shkak të moshave, për dy shtetas 16-vjeçarë dhe për një shtetas 15 vjeç, si dhe u shpall në kërkim një shtetas tjetër 15 vjeç, pasi dyshohet se në bashkëpunim me njëri-tjetrin, më datë 01.07.2023, kanë vjedhur në banesën e një shtetasi, një shumë të konsiderueshme parash. Në Lushnjë, u arrestua shtetasi E. C., 34 vjeç, banues në fshatin Allkaj, Lushnjë, pasi dyshohet se ka vjedhur një shumë parash, në një lokal”, konfirmon policia.
Materialet procedurale i kaluan Prokurorisë pranë Gjykatës së Shkallës së Parë të Juridiksionit të Përgjithshëm Fier, për veprime të mëtejshme.
p.k\dita
