Presidenti amerikan, Donald Trump në lidhje me marrëveshjen e SHBA dhe Ukrainës për mineralet e rralla ka deklaruar se i ka thënë liderit ukrainas që ta nënshkruante marrëveshjen, sepse do të ishte në të mirë të vendit të tyre, pasi Rusia është me fortë se ta.
Marrëveshja fillestare duhej të nënshkruhej në shkurt, por u prish pas një shkëmbimi të nxehtë në Shtëpinë e Bardhë kur Trump akuzoi Zelenskyn se luante me Luftën e Tretë Botërore.
Zbulimi i madh vjen disa ditë pasi Trump dhe Zelensky zhvilluan një takim ballë për ballë në prag të funeralit të Papa Françeskut, dhe ndërsa bisedimet midis Moskës dhe Uashingtonit mbi një armëpushim të mundshëm në Ukrainë vazhdojnë.
Duke telefonuar në rrjetin NewsNation të mërkurën në mbrëmje, Trump tha se i kishte bërë presion Zelenskyt në Qytetin e Vatikanit për të nënshkruar marrëveshjen.
“I thashë atij se është një gjë shumë e mirë nëse mund të prodhojmë një marrëveshje që ju ta nënshkruani atë, sepse Rusia është shumë më e madhe dhe shumë më e fortë. Rusia thjesht po ecën përpara,” tha ai.
Presidenti amerikan tha se marrëveshja do të rikuperonte ndihmën shumëmiliardë dollarëshe të SHBA-së për Ukrainën që nga fillimi i luftës dhe “shumë më tepër në teori”.
“Kështu që shkova tek ata dhe u thashë: ‘Shikoni, duhet të marrim tokë të rrallë.’ Ata kanë tokë të rrallë të shkëlqyer, që do të thotë minerale dhe materiale të caktuara. Ata kanë gjëra që shumë vende nuk i kanë. Është një aset i madh që ata kanë,” tha Trump.
I pyetur nëse marrëveshja për mineralet do ta “pengonte” udhëheqësin rus Vladimir Putin, Trump tha: Epo, mund të jetë kështu.
Marrëveshja vjen në mes të një lufte tregtare të SHBA-së me Kinën, nga ku burojnë 90% e rezervave aktuale të metaleve të rralla në botë.
j.l./ dita
