Më 25 mars 2023, sipas njoftimit të dy ditëve më parë, u zhvillua mbledhja e kryesisë së Komitetit Kombëtar të Organizatës së Veteranëve dhe Pasardhësve të LANÇ. Takimi u mbajt në sallën Shpataraku të Muzeut Historik Kombëtar dhe në mbledhje merrnin pjesë 54% e anëtarëve të Kryesisë me të drejtë vote.
Mbledhjen e hapi nënkryetari Murat Dardha dhe drejtimi i saj u bë nga ai dhe veterani Dailan Buxheli. Fillimisht, Dardha në emër të Kryesisë pranoi dorëheqjen e Dhimitër Shtembarit nga funksionet e tij drejtuese.
Në mbledhje merrnin pjesë edhe anëtarët e Komisionit të Ndjekjes së Proçedurave dhe Kritereve për administrimin e kërkesave për kandidim për postin e Kryetarit të Komitetit Kombëtar.
U lexua një raport i pregatitur nga tre nënkryetarët dhe veç pjesëmarrësve si anëtarë të Kryesisë të ulur në sallë, konfirmuan me mesazh online dakortësinë për rendin e ditës dhe vazhdimësinë e punës të Komisionit, Anastas Angjeli, Gjinovefa Kadriu, Guri Seferi dhe Sefer Duka.
Profesor Ksenofon Krisafi, profesor Bernard Zotaj, Dr.Dorian Koçi, Av. Spartak Braho, Dailan Buxheli e Thoma Konduri, shprehën në diskutimet e tyre shqetësimin për gjendjen e shkaktuar në Kryesinë e Organizatës.
U shpreh keqardhja për mungesën e disa prej anëtareve që nuk njoftuan paraprakisht mungesën e tyre, përfshirë edhe sekretarin e Pergjithshem, Veli Myftari, si i vetmi i munguar nga 4 drejtuesit kryesorë të kryesisë.
U theksua se drejtimi të vazhdojë të bëhet konform Rregullores ekzistuese për vetë mangësitë që paraqet statuti në këtë drejtim.
Në mbledhje veç të tjerave, u vendos të vazhdojë puna e Komisionit të Kritereve e Proçedurave për administrimin, shqyrtimin e kandidaturave të depozituara që kandidojnë për detyrën e Kryetarit të Komitetit.
Lidhur me kandidaturat, kreu i Komisionit, Spartak Braho tha se është paraqitur kandidaturë nga Shaqir Vukaj.
“Shaqir Vukaj ka depozituar kërkesën për të konkuruar për kryetar. Kërkesa është paraqitur ne Komisionin e ngritur. Pritet që grupimi i Myftarit të nxjerrë Hulusi Hakon, 94 vjeç” – tha për DITA, pas mbledhjes, avokati Braho.
Procesverbali i plotë i mbledhjes mund të lexohet duke klikuar KËTU
o.p. / dita
