Në një operacion ushtarak të zhvilluar dje, më 22 shkurt 2026, ushtria meksikane ka vrarë Nemesio Oseguera Cervantes, i njohur botërisht si “El Mencho”.
Ai ishte lideri i kartelit më të fuqishëm dhe më brutal në Meksikë aktualisht, Jalisco Nueva Generación.
Operacioni u krye në agim në qytetin Tapalpa, në shtetin e Jalisco-s.
Gjatë tentativës për arrestim, pati një shkëmbim zjarri të ashpër. El Mencho u plagos rëndë dhe vdiq gjatë transportit me helikopter drejt Mexico City-t.
Përveç bosit, raportohet për të paktën 7 anëtarë të kartelit të vrarë dhe disa ushtarë të plagosur.
SHBA-ja (përmes inteligjencës) thuhet se ka luajtur një rol kyç, pasi mbi kokën e tij rëndonte një shpërblim prej 15 milionë dollarësh.
Vrasja e tij ka ndezur një valë dhune hakmarrëse në disa shtete. Anëtarët e kartelit kanë bllokuar autostradat kryesore në Jalisco dhe Michoacán.
Në Guadalajara dhe Puerto Vallarta, qytetarëve u është kërkuar të qëndrojnë brenda. Shkollat janë mbyllur për ditën e hënë (sot).
Departamenti i Shtetit ka lëshuar një paralajmërim “shelter-in-place” për turistët amerikanë në zonat e prekura.
El Mencho konsiderohej “Armiku Publik Nr. 1” pas rënies së El Chapos. Karteli i tij kontrollon pjesën më të madhe të trafikut të fentanilit drejt SHBA-së, një krizë që ka qenë në qendër të diplomacisë mes dy vendeve.
Ky operacion vlerësohet si goditja më e madhe e qeverisë së presidentes Claudia Sheinbaum kundrejt karteleve deri më sot.
M.Aleksi / Dita
