Wojciech Szczesny, portieri i Juventusit dhe kombëtares polake, i është rikthyer edhe njëherë episodit të 13 prillit. “Gardiani” ndjeu shqetësimë gjatë sfidës ndaj Sportingut të Lisbonës në Europa League.
Duke u detyruar të largohej nga fusha pasi vuri dorën në gjoks. Mjekët e Juves u futën me shpejtësi në fushë dhe e qetësuan fillimisht polakun. I cili, edhe pse dukshëm i frikësuar, arriti në dhomat e zhveshjes me këmbët e tij.
“U tremba, kisha ankth, diçka e tillë nuk më kishte ndodhur kurrë më parë”, deklaronte 33-vjeçari. Që për fat të mirë nuk kishte asnjë problem shëndetësor. Szczesny i është rikthyer sërish atij episodi.
“Me të vërtetë mendova se do të vdisja, ishte e frikshme. E ndjeva sikur zemra do të më shpërthente në gjoks… I thashë Milik se ndihesha keq.
Dhimbja në gjoks ishte e tmerrshme dhe ende nuk e di saktësisht sot se çfarë ishte. Ndoshta disa probleme me shpinë ose shtyllën kurrizore”, kujton portieri i Polonisë.
Kombëtare të cilën kuqezinjtë e Sylvinhos do e presin në “Air Albania” (10 shtator). “Finale” e vlefshme për grupin E të eliminatoreve të Euro 2024.
