Botuesi: “Nëse audio-përgjimet janë origjinale, Berisha shkon në burg”

Në një analizë të tij për përgjimet e reja të “21 Janarit”, analisti Mero Baze thotë se sulmi që po i bën kreu i PD  provave të publikuara nw media nga gazetari Artan Hoxha, tregon sa i rrezikuar ndjehet ai para ligjit.

Baze thotë se ndryshe nga çka thënë deri më tani, duket se Berisha i ka kushtuar rëndësi përgjimeve duke zgjedhur ti sulmojë duke I quajtur montazh.

“Normalisht Sali Berisha duhet ta kishte injoruar daljen e përgjimeve të reja rreth urdhrave që komandanti i Gardës ka dhënë më 21 janar për të vrarë. Për t’u dukur i qetë dhe i sigurtë, mund të thoshte që kjo është brenda ligjit apo broçkulla të tjera që thotë gjithmonë.

Por për çudinë e të gjithëve, ai u trazua keq dhe sulmoi inçizimet si të montuara. Pak a shumë siç tha për kasetën e Ilir Metës me Dritan Priftin që çoi tek 21 Janari.

Egërsia me të cilën ai sulmoi përgjimet e reja si montazh, është e rëndësishme për të kuptuar vlerën juridike të atyre përgjimeve”, shkruan Mero Baze.

Sipas tij, nëse përgjimi do ishte i parëndësishëm, Berisha do të thoshte siç ka thënë 12 vjet, “kemi zbatuar ligjin”, “kemi mbrojtur rregulloren e bulevardit”, “rregulloren e sheshit” etj.

“Në fakt, i harroi të gjitha gënjeshtrat çfarë ka thënë 12 vjet dhe tha që ai përgjim nuk është i vërtetë, është i montuar etj. Pra reagoi si njeri i rrezikuar prej tyre, nëse janë të vërteta.

Pra e vetmja mbrojtje që i ka mbetur pas daljes së përgjimit është që ai të mos jetë i vërtetë”, thotë Baze në analizën e tij.

Në fund, analisti thotë se tashmë i takon gjykatës të vendosë fajësinë apo jo të Berishës por, sipas Bazes, nëse  kaseta origjinale është origjinale, ai do të duhet të vuajë dënimin për urdhrin e dhënë për vrasjen e 4 qytetarëve të pafajshëm në Bulevard.