Vijojnë testimet për të gjithë mësuesit që këtë vit janë përfshirë në garë për punësimet e reja që do të realizohen sipas vendeve të lira të shpallura nga shkollat e arsimit të detyruar 9-vjeçar, si dhe gjimnazeve. Përgjatë ditës së nesërme, provimit do t’i nënshtrohen mësuesit e lëndës së Fizikës, për të vijuar më pas në datën 1 gusht më mësuesit e profilit të Shkencave sociale dhe ata të TIK, teksa në datën 2 gusht do të kalojnë në testim të gjithë mësuesit që janë në profilin e arsimit special.
Pas vlerësimeve të bëra për të gjithë kandidatët e këtyre profileve, Qendra e Shërbimeve të Arsimit ka shpallur gjatë ditës së djeshme listën zyrtare të kandidatëve që plotësojnë kushtet për të dhënë provimin e punësimit, ku për secilin prej tyre është përcaktuar jo vetëm data, por edhe ora e duhur, se kur duhet të paraqiten në ambientet e kësaj qendre për të plotësuar testin e informatizuar sipas formatit të përcaktuar.
Edhe për këtë kategori arsimtarësh do të vlejnë të njëjtat rregulla sa i takon zhvillimit të provimit. Për të mos rrezikuar përjashtimin nga gara, në ditën e testimit, kandidati jo vetëm që duhet të paraqitet në orarin e përcaktuar, por duhet të jetë i pajisur me: letërnjoftim (Kartë ID ose Pasaportë, dokumenti origjinal dhe kopje të tyre, si dhe formularin e pjesëmarrjes në testimin e informatizuar të lëshuar nga komisioni i vlerësimit të dosjeve në DRAP. Sikundër ndodh edhe me provimet e shtetit, edhe për testin e informatizuar për çdo mësues orari i pjesëmarrjes në provim do të jetë i përcaktuar dhe nuk do të ketë ndryshime orari përtej planifikimit të publikuar në faqen zyrtare të Qendrës së Shërbimeve të Arsimit.
Lidhur me përmbajtjen e testit, autoritetet e kësaj qendre sqarojnë se testi do të jetë i strukturuar në dy pjesë. Pjesa e parë përmban pyetjet për njohjen e dokumenteve zyrtare që kanë të bëjnë me veprimtarinë e mësuesve, njohjen e programeve lëndore përkatëse, metodologjinë e mësimdhënies dhe të të nxënit, në përgjithësi dhe të lëndës, etikën dhe komunikimin e mësuesit në institucionin arsimor, aspekte të drejtshkrimit të gjuhës shqipe. Ndërsa pjesa e dytë do të ketë pyetje rreth njohurive shkencore të lëndës në të cilën mësuesi do të japë mësim, sipas programit orientues përkatës.
Përzgjedhja e fituesve
Vlerësimi i kandidatëve, të cilët aplikojnë për t’u punësuar në vendet e lira që krijohen në profilin e tyre në qytetet ku kanë aplikuar përbëhet nga pikët që ai ka siguruar në fazën e parë të konkurrimit që përfshin pikët e dosjes, si dhe pikët e fituara nga testimi që do të zhvillohet sipas datave të përcaktuara për secilin profil. Rezultati i këtyre dy treguesve përbën edhe pikët finale të mësuesit. Mësuesit që kanë siguruar nivelin më të lartë pikëve do të jenë të parët që do të ftohen të zgjedhin vendet e punës, sipas kuotave të lira të raportuara për çdo njësi vendore të arsimit në vend.
Në këto kushte, renditja përfundimtare për çdo lëndë bëhet sipas pikëve totale që nxirren nga shuma e pikëve të marra në vlerësimin e dosjes së aplikimit dhe pikëve të marra në testimin “Mësues për Shqipërinë 2022. “Renditja fillon me kandidatin me më shumë pikë dhe vijon në rendin zbritës. Kandidati i cili në renditjen e përgjithshme sipas profilit, apo lëndës është renditur me numrin më të madh të pikëve, ka të drejtën të zgjedhë i pari vendin e lirë të punës ku do të lidhë kontratën. Ky kandidat me pikët më të larta, ftohet nga komisioni dhe zgjedh një nga vendet e lira me ngarkesë të plotë, të pjesshme, apo dhe të përhershme, sipas preferencave të shprehura edhe prej tij vetë”, sqarohet në udhëzimin e miratuar nga MAS sa i takon procedurave të punësimit nëpërmjet portalit online “Mësues për Shqipërinë”. Po sipas këtij udhëzimi, kandidatët nuk mund të refuzojnë më shumë se tri vende pune të lira, në tri njoftime të njëpasnjëshme të komisionit. Në rast se kjo ndodh mësuesi hiqet nga lista e renditjes, duke i lënë vendin e përzgjedhjes një tjetër kandidati.
Në ditën e testimit, kandidati:
- Duhet patjetër të paraqitet pranë QSHA-së 30 minuta para orarit të përcaktuar për zhvillimin e testit.
- Duhet të ketë me vete vetëm dokumentet e kërkuara Letërnjoftim (Kartë ID ose Pasaportë, dokumentin origjinal dhe kopje të tyre, si dhe formularin e pjesëmarrjes në testimin e informatizuar të lëshuar nga komisioni i vlerësimit të dosjeve në DRAP.
- Duhet të ketë me vete stilolaps për nënshkrimin e deklaratës dhe rezultatit të testimit.
- Nuk lejohen celularët, çantat dhe sende të tjera personale të panevojshme për zhvillimin e testimit.
- Kandidatët, të cilëve u mungojnë këto dokumente, nuk mund të marrin pjesë në testimin e informatizuar
Tematikat për të cilat mësuesit do të vlerësohen në testim përfshijnë këto fusha:
- Njohjen e dokumentacionit zyrtar që lidhet me profesionin e mësuesit dhe që shërben si rregullator në punën e përditshme të mësuesit për çdo institucion arsimor.
- Njohjen e dokumentacionit kurrikular të programit lëndor.
- Njohuritë rreth aspekteve të pedagogjisë, metodologjisë dhe përdorimit të TIK-ut në mësimdhënie.
- Njohuritë rreth aspekteve të etikës dhe të komunikimit.
- Njohuritë rreth drejtshkrimit të gjuhës shqipe.
- Njohuritë rreth përmbajtjes shkencore të lëndës që zhvillon mësim.
