González Alemán, meteorolog i AEMET, ka shpërndarë një imazh në llogarinë e tij zyrtare në Twitter, që ka gjeneruar komente të shumta nga ndjekësit. Ai shpjegon se “ngrohja e sipërfaqes së detit të Atlantikut të Veriut intensifikohet përsëri në nivele rekord”.
Në fakt, vetë eksperti i meteorologjisë thekson në Twitter se “imazhi është mbresëlënës”, pasi “anomalia bie në sy në mënyrë të ekzagjeruar në krahasim me pjesën tjetër të globit”. Pas këtij mesazhi të parë, J. J. González Alemán ka shpjeguar se çfarë e ka shkaktuar këtë intensifikim. “Kemi vazhduar të kemi një qarkullim atmosferik jo normal për kohën në javët e fundit, me dobësimin e anticiklonit të Azores. Jo vetëm kaq, sepse llogaritet edhe ‘ferri i Saharasë’. Në vend të kësaj, mbizotëron bllokada anticiklonike në veri”, shkruan ai në një mesazh.
Spanja, Italia, madje i gjithë Mesdheu perëndimor, përfshi Shqipërinë, po përballet me valën e saj të parë të nxehtë këtë verë, por edhe paqëndrueshmërinë atmosferike apo të rrymave ajrore. Në fakt termometrat do të vijojnë të rriten edhe të hënën 26 qershor (sot), ditë ku priten temperaturat më të larta në rajon. Fundi i episodit të nxehtësisë pritet të arrijë ditën e enjte, më 29 qershor, pasi temperaturat pritet të kthehen në normalitet dhe do të kemi termometra më tipikë për këtë periudhë të vitit.
