Milinkovic-Savic u largua nga Lazio gjatë merkatos së kësaj vere, me mesfushorin i cili u transferua në kampionatin arab te skuadra e Al-Hilal.
Një lëvizje e kërkuar me ngulm nga lojtari, i cili ka firmosur një kontratë tre vjeçare dhe nga e cila do të përfitojë 20 milionë euro.
Aventura e re për Sergej Milinkovic-Savic sapo ka nisur, ndërsa mesfushori ka dhënë edhe deklaratën e parë zyrtare duke shpjeguar gjithçka, sa i përket këtij transferimi.
“Gjithçka filloi gjatë pushimeve. Agjentët e mi më njoftuan për ofertën e Al-Hilal. Të them të drejtën fillimisht nuk dija si t’i përgjigjesha, por më pas u informova dhe vendosa të pranoja. Më duhej një ndryshim dhe ja ku jemi. Al-Hilal? Është një skuadër shumë e mirë, me traditë dhe që luan për trofe. Më parë ne erdhëm këtu për të luajtur Superkupën e Italisë (2019) dhe u stërvitëm në stadiumin e Al-Hilal, isha në dijeni të skuadrës edhe përpara ofertës. Këtu kam kujtime të bukura sepse atë edicion triumfuan me Lazion. Unë jam këtu për të ndihmuar skuadrën që të përmbushë objektivat dhe natyrisht dua edhe të rritem më shumë personalisht. Pritja? Shumë tifozë më kanë shkruar në rrjetet sociale, jam shumë i lumtur me këtë pritje” – përfundoi Milinkovic-Savic.
