Edhe pse mund të mendohen plane të largëta për të kultivuar të korra në Mars, një tjetër hapësirë e shfrytëzueshme për zhvillimin e bujqësisë këtu në tokë, mund të jetë edhe deti.
Një familje italiane në biznesin e pajisjeve të zhytjes beson se hapësira tjetër e punueshme e pashfrytëzuar është pikërisht deti.
Kopshti Nemo është sistemi i parë në botë i kultivimit nënujor të bimëve tokësore. E vendosur në brigjet e Nolit, Itali, në jugperëndim të Genovas, ferma përbëhet nga një sërë serash të varura, transparente, në formë kube të quajtura biosfera, të ankoruara në fund të detit.
“Misioni i kësaj teknologjie është të ndryshojë bujqësinë, t’i japë asaj një mundësi shtesë për rritjen e prodhimeve në sasinë e madhe të vijave bregdetare të Tokës, duke qenë e qëndrueshme dhe të mos ndikojë në mjedis,” tha për CNN bashkëthemeluesi Luca Gamberini.
Babai i tij dhe themeluesi i kompanisë së pajisjeve nënujore Ocean Reef Group, Sergio Gamberini, doli me idenë duke kombinuar dy pasionet e tij – zhytjen në skuba dhe kopshtarinë. Në vitin 2012, projekti filloi me mbjelljen e borzilokut në një tullumbace nën ujë. Dhjetë vjet më vonë, Kopshti i Nemos po bëhet i fortë.
Me popullsinë globale që pritet të arrijë afërsisht 10 miliardë deri në vitin 2050, OKB-ja vlerëson se prodhimi i ushqimit do të duhet të rritet deri në 60% për të përmbushur këtë kërkesë.
Duke lundruar 6 deri në 10 metra nën ujë, bimët në Kopshtin e Nemos janë të ndara nga çdo patogjen dhe dëmtues i jashtëm. Gjithashtu, temperatura relativisht e qëndrueshme e ujit të detit është një mjedis ideal për jetën e bimëve.
Kopshti i Nemos përdor hidroponikë, një teknikë që përdor lëndë ushqyese me bazë uji në vend të tokës, e njëjta metodë e përdorur në shumicën e fermave vertikale të brendshme. Rrezet e diellit arrijnë te bimët, por dritat shtesë të rritjes përdoren kur nevojitet.
Gjithçka monitorohet në tokë përmes kamerave dhe sensorëve, dhe cilësimet mund të rregullohen nga distanca nga kudo në botë.
Kur të vijë koha për të korrur, një zhytës do të presë bimësinë, do ta vendosë në thasë dhe do ta nxjerrë në sipërfaqe.
Meqenëse biosferat janë vetëm rreth dy metra në diametër, ato nuk mund të rritin kultura më të mëdha si misri apo gruri. Por ato mund të përshtaten diku nga 70 deri në 100 bimë më të vogla.
Kompani të tjera në mbarë botën po eksplorojnë gjithashtu përfitimet e deteve për bujqësinë. GreenËave, një organizatë jofitimprurëse në Amerikën e Veriut, po rrit alga deti dhe butakë në një skelë nënujore . Kompania Sea6 Energy me bazë në Bangalore ka krijuar një traktor të mekanizuar që mund të mbjellë dhe korrë alga deti në fundin e oqeanit citon CNN.
p.k\dita
