Ndryshimet klimatike dhe rezistenca antimikrobike janë dy nga kërcënimet më të mëdha për shëndetin global, sipas një raporti të ri nga Programi i Kombeve të Bashkuara për Mjedisin.
Raporti, i titulluar “Bracing for superbugs”, thekson rolin e ndryshimit të klimës dhe faktorëve të tjerë mjedisorë që kontribuojnë në rritjen e rezistencës antimikrobike.
Rezistenca antimikrobike ose AMR ndodh kur mikrobet si bakteret, viruset dhe kërpudhat zhvillojnë aftësinë për të mposhtur medikamentet e krijuara për t’i vrarë ato.
“Zhvillimi dhe përhapja e AMR do të thotë që antimikrobikët e përdorur për të parandaluar dhe trajtuar infeksionet tek njerëzit, kafshët dhe bimët mund të bëhen joefektive, me mjekësinë moderne që nuk është më në gjendje të trajtojë as infeksione të lehta”, tha Programi i Mjedisit në OKB-së në një njoftim për shtyp.
Afërsisht 5 milionë vdekje në mbarë botën u shoqëruan me rezistencën antimikrobike në vitin 2019 dhe numri vjetor pritet të rritet në 10 milionë deri në vitin 2050 nëse nuk ndërmerren hapa për të ndaluar përhapjen e rezistencës antimikrobike, sipas raportit.
Antimikrobikët zakonisht përdoren në produkte pastrimi, pesticide bimore dhe medikamente për të vrarë dhe parandaluar përhapjen e mikrobeve midis njerëzve, kafshëve dhe të korrave.
Rezistenca ndaj ilaçeve mund të zhvillohet natyrshëm, por ekspertët thonë se përdorimi i tepërt i antimikrobikëve tek njerëzit, kafshët dhe prodhimi i ushqimit e ka përshpejtuar procesin. Mikroorganizmat që i mbijetojnë këtyre kimikateve janë më të fortë dhe më të fuqishëm, dhe ata mund të përhapin gjenet e tyre rezistente ndaj ilaçeve te mikrobet që nuk janë ekspozuar kurrë ndaj antimikrobikëve.
o.j/dita
