Pas mbërritjes në Itali në vitin 2009 nga Kruja, Armand Kurti punoi 10 vjet si punëtor në bujqësi dhe pas 10 vitesh, në moshën 30-vjeçare, ai është bërë sipërmarrës falë vullnetit të tij dhe shpirtit të sakrificës.
“Shkalla e varfërisë ka qenë gjithmonë ndër më të lartat në Europë në vendin tim të origjinës. Kjo është arsyeja pse familja ime vendosi të vinte në Itali dhe më saktë në Basilicata. Ne donim të gjenim një punë dhe të jetonim pa shqetësime, por gjërat shkuan ndryshe. Në shumë vite kam punuar shumë lloje punësh në bujqësi, një sektor që gjithmonë më ka pëlqyer”, thotë Kurti i cili tregon se me kalimin e viteve kuptoi se donte të bënte diçka më shumë sesa thjeshtë të punonte në fermën e dikujt tjetër. Kështu, në vitin 2019 ai ngriti biznesin e tij falë ndihmës që i dhanë disa miq.
Në fillim ai mbolli kajsi, pjeshkë dhe nektarina. Tani Kurti kultivon rreth 120 hektarë, duke përfshirë tokën e tij por edhe disa toka të marra me qira në komuna të ndryshme të zonës Metaponto si Scanzano Jonico, Tursi dhe Policoro.
Pavarësisht se tani është sipërmarrës, Kurti vazhdon të punojë si një punëtor i thjeshtë, si në fillimet e tij kur e donte bujqësinë dhe vendin e tij të ri.
“Në vitin 2022 kam mbjellë dy hektarët e mi të parë me luleshtrydhe Sabrosa-Candonga, një variant që bëhet kryesisht në zonën e Basilicata. Këtë vit kam 350 mijë bimë në 5 hektarë”, thotë Kurti.
Në biznesin e tij punësohen mbi 200 persona, 38 prej të cilëve janë të punësuar gjatë gjithë vitit.
“Unë nuk kam probleme në gjetjen e punëtorëve. Preferoj të fitoj më pak para dhe t’i paguaj punonjësit e mi në mënyrë të drejtë, duke i bërë ata të punojnë për orët e përcaktuara. E di mirë se çfarë do të thotë të mbledhësh luleshtrydhe për orë të tëra ose të ngarkosh arka portokalli në kamionë”, thotë Kurti.
Kurti e shpërndan produktin e tij në tregje të ndryshme italiane, nga Pulia në Lombardi.
Ai tregon se është i kënaqur me atë që ka arritur deri më tani, por mbi të gjitha “ndjehem me fat që kam gjetur pasurinë time në Basilicata. Është një rajon i mrekullueshëm, i mbushur me tokë pjellore dhe mundësi. Thjesht duhet të bëni një përpjekje. Nëse punoni mirë dhe me përulësi, rezultatet vijnë. Historia ime është provë se kushdo mund t’ia dalë”.
Burimi: Fresh Plaza.
