Një gazetë iraniane ka publikuar një grafik të krijuar me inteligjencë artificiale, ku shfaqen presidenti amerikan Donald Trump dhe kryeministri izraelit Benjamin Netanyahu me uniforma burgu, me mbishkrimin “Hakmarrja është e sigurt”.
Grafika e publikuar nga gazeta Hamshahri paraqet 13 figura politike dhe ushtarake amerikane, izraelite dhe europiane, të cilat gazeta i akuzon si përgjegjëse për vrasjen e ish-udhëheqësit suprem të Iranit, Ajatollah Ali Khamenei, gjatë sulmit amerikano-izraelit që shënoi nisjen e luftës më 28 shkurt.
Në imazh janë përfshirë edhe sekretari amerikan i Shtetit Marco Rubio, sekretari i Mbrojtjes Pete Hegseth, komandanti i Komandës Qendrore amerikane Brad Cooper, si dhe ambasadori amerikan në Izrael Mike Huckabee.
Por ajo që ka tërhequr më shumë vëmendjen është përfshirja e katër liderëve europianë: kryeministres italiane Giorgia Meloni, kryeministrit britanik Keir Starmer, presidentit francez Emmanuel Macron dhe kancelarit gjerman Friedrich Merz.
Publikimi erdhi pak pas mesazhit publik të liderit të ri suprem të Iranit, Ajatollah Mojtaba Khamenei, pas ceremonive mortore për të atin. Ai premtoi hakmarrje ndaj personave përgjegjës për vrasjen e liderit iranian, duke e cilësuar atë si kërkesë të kombit.
Në deklaratën e transmetuar nga televizioni shtetëror iranian, Khamenei tha se hakmarrja “duhet patjetër të ndodhë”.
j.l./ dita
