Në “Air Albania”, Tirana do të presë gjeorgjianët e Dinamo Batumi në datën 13 korrik. Për këtë sfidë, UEFA ka vendosur që të sjellë në kryeqytet një katërshe me shumë eksperiencë nga Anglia. Robert Jones, Harry Lennard, Wade Smith dhe Thomas Bramall do të vendosin drejtësi për nënkampionët e Shqipërisë. 36-vjeçari Jones është një nga gjyqtarët më aktiv në sezonin e fundit, teksa ka gjykuar 26 ndeshje në Premier League si gjyqtar i parë dhe 21 të tjera si i katërt. Plot 47 ndeshje vetëm në nivelin më të lartë të futbollit anglez.
Për më tej, sfida mes Ararat dhe Egnatias u është besuar katër gjyqtarëve nga Malta, me kryesorin Trustin Farrugia Cann që do të ndihmohet nga Roberto Vella James Muscat dhe Glen Tonna. Kryesori i kësaj sfide gjykon në kompeticionet europiane për klube që nga 2017, ndërkohë që në vitin 2013 ka qenë gjyqtar i katërt në ndeshjet e Kombëtares së Shqipërisë ndaj Luksemburgut të fituar 1-2 në transfertë dhe ndaj Letonisë në Tiranë të fituar 2-0 në kualifikueset e botërorit.
Po ashtu edhe në vitin 2021, ai ka qenë kryesor në ndeshjen U-21 Kosovë-Shqipëri, që përfundoi 2-1.Egnatia është debutuese në Conference League, me ekipin rrogozhinas që fitoi Kupën e Shqipërisë, ndërsa u rendit dhe në vendin e tretë të Superiores, duke qenë surpriza më e bukur e këtij edicioni.
Kurse Vllaznia do të gjykohet nga një grup gjyqtarësh nga Luksemburgu. Ivo Torres, Joaquim Da Silva, Tom Hansen dhe François Becker do të vënë drejtësi në takimin mes Linfield–Vllaznia. Torres do të debutojë në komepticionet europiane për klube pikërisht në sfidën e shkodranëve, ndërsa në të shkuarën është angazhuar vetëm në ndeshje moshash në nivel kombëtaresh.
Shkodranët do të luajnë ndeshjen e parë në transfertë, ndërkohë që do të diskutojnë kualifikimi një javë më vonë në “Loro Boriçi”, ku shpresojnë që me ndihmën e tifozëve të arrijnë të kalojnë këtë raund. Ekipi shkodran ka bërë revolucion, teksa është ekipi me më shumë lëvizje deri më tani.
