Migena Aleksi
Producenti i njohur francez Nicolas Altmayer, 61 vjeç, dhe bashkëshortja e tij, Mathilde Favier, 57 vjeçe, drejtuese e marrëdhënieve me publikun në shtëpinë e modës Christian Dior, kanë ndërruar jetë pas një aksidenti tragjik me makinë.
Aksidenti ka ndodhur pasditen e së hënës në rrugën D938 në Airvault, në rajonin Deux-Sèvres në perëndim të Francës. Sipas të dhënave të para nga prokuroria e Niort-it, automjeti me të cilin udhëtonte çifti është përplasur kokë më kokë me një mjet të rëndë (kamion) gjatë një manovre parakalimi.
Nicolas Altmayer ishte bashkëthemelues i shtëpisë së njohur të prodhimit Mandarin & Compagnie (së bashku me të vëllanë, Eric Altmayer). Ai njihej si një nga producentët më me ndikim në Francë, pas realizimit të dhjetëra filmave të suksesshëm si saga komike “OSS 117”, “Brice de Nice”, si dhe bashkëpunimeve të vlerësuara me regjisorë të mëdhenj si François Ozon (“Frantz”, “By the Grace of God”) apo Bertrand Bonello (“Saint Laurent”). Në vitin 2017, ai u nderua me çmimin prestigjioz “Daniel Toscan du Plantier” si producenti i vitit.
Mathilde Favier ishte prej viteve një nga figurat më qendrore dhe më të respektuara në industrinë ndërkombëtare të modës, duke mbajtur postin e Drejtores së PR-it për Christian Dior Couture.
Grupi LVMH dhe drejtuesja e Dior, Delphine Arnault, shprehën hidhërimin e thellë për humbjen e saj, duke e cilësuar si një grua të jashtëzakonshme, plot optimizëm, energji dhe elegancë.
Lajmi për ndarjen e tyre të parakohshme nga jeta ka nxitur mesazhe të shumta ngushëllimi nga emra të njohur të artit, kinematografisë dhe modës botërore.
DITA
