Pas ngjarjes së rëndë në Vlorë, ku një i ri humbi jetën pasi ra në kontakt me tensionin e lartë, teksa ishte duke korrur grurë me autokombanjë, serish janë shënuar aksidente me mjete bujqësore, ku njëri ka rezultuar fatal duke shkaktuar vdekjen e një 20-vjeçari. Aksidenti i rëndë është shënuar në Peqin, mbrëmjen vonë të së enjtes, në fshatin Çengelaj, ku një 20-vjeçar teksa punonte tokën me mjetin bujqësor zetor, ka humbur kontrollin dhe është përmbysur.
Për pasojë, 20-vjeçari me iniciale D.H., është dëmtuar rëndë sepse zetori e zuri poshtë dhe ka humbur jetën në vendngjarje. Po dje në Elbasan u raportua edhe për një vajzë 15-vjeçare që u dërgua nga familjarët në Spitalin Rajonal Elbasan për mjekim, e cila sipas deklarimeve të bëra dhe nga veprimet e para hetimore, rezulton se ka rënë në kontakt me rrymën elektrike pasi ka prekur autokombajnën, me të cilën punonte babai i saj. Aksidentet tragjike të fermerëve kohët e fundit janë shtuar ndjeshëm dhe në dy muaj raportohet për të paktën 6 viktima dhe disa të plagosur rëndë gjatë punës me mjete bujqësore.
