Ndikimi i vazhdueshëm që rrjetet sociale kanë në jetën tonë është tashmë një realitet të cilin e justifikojmë me shumë arsye.Shpeshherë ato që paraqiten në rrjetet sociale, na i formësojnë qëndrimet, opinionet dhe sjelljet tona karshi ngjarjeve të caktuara. Tani me anë të rrjeteve sociale organizata të shumta, e plasojnë informacionin e tyre dhe pret që masa t’iu ofrojë një përgjigje, reagim dhe qëndrim.
Duke pasur këtë ndikim, rrjetet sociale tanimë po shërbejnë si kanale përmes të cilave edhe synohet të ndërrohen sjelljet për të mirë dhe të përmirësohet gjendja aktuale në vend.
Ndonëse rrjetet sociale kategorizohen sipas preferencave dhe interesave tona, krijuesit e tyre vazhdimisht hedhin ide për rrjete të reja sociale me një larmishmeri funksionesh dhe përdorimesh.
I përshkruar si kombinimi perfekt i Instagram, TikTok dhe Pinterest, Lemon8 është aplikacioni i ri social që shkarkojnë të gjithë jashtë shtetit. Lemon8 u lançua në Singapor, Tajlandë dhe Japoni në vitin 2020, ai ka bërë shumë zhurmë këto ditë pasi ishte një nga 10 aplikacionet më të shkarkuara në botë javën e kaluar, i cili ka për funksion ndarjen e fotografive dhe videove në stilin Instagram, në pronësi të kompanisë mëmë të TikTok.
Lemon8 do të përdoret për të kuruar përmbajtjen e fotografive dhe videove kryesisht për ushqimin, mirëqenien, bukurinë dhe udhëtimin.
Në Lemon8 në fakt mund të shtoni foto dhe video në profilin tuaj, të eksploroni faqe sugjerimesh të kuruara posaçërisht për ju dhe gjithashtu të “ndiqni” dhe të “ndiqeni”; ashtu si në Instagram.
Megjithatë, ndryshe nga rrjetet e tjera sociale, Lemon8 thekson mundësinë e blerjes së përmbajtjeve që shihni të fotografuara në profilet e përdoruesve të tjerë.Një nga veçoritë më tërheqëse të aplikacionit është përdorimi i dizajnit grafik në shumicën e postimeve.
Krijuesit shpesh shtojnë tekst në imazhe, duke etiketuar atë që portretizohet në foto ose ku mund ta gjejnë atë objekt. Këto etiketa shpesh shoqërohen me link.
Jo vetëm fotot, përdoruesit e Lemon8 gjithashtu mund të ndajnë video deri në 60 sekonda dhe të ripostojnë TikTok-un e tyre.
Sipas shumë njerëzve, rritja e papritur e popullaritetit të këtij rrjeti social është për shkak të publicitetit që i kanë bërë disa krijues shumë të njohur të TikTok. Lemon8 dhe TikTok i përkasin të njëjtës kompani mëmë, ByteDance, dhe përflitet se ishte kompania që u kërkoi përdoruesve të saj të mëdhenj sponsorizimin e rrjetit të dytë social.
Për momentin Lemon8 është i disponueshëm vetëm në disa vende të përzgjedhura dhe Shqipëria për momentin nuk është mes tyre.
o.j/dita
