Ambasada Amerikane në Prishtinë tha se Zyra e Kryeministrit të Kosovës, Albin Kurti dhe ajo e Presidentes Vjosa Osmani, do marrin pjesë në diskutimin për Asociacionin, që do ta organizojë kjo ambasadë më 31 janar.
“Qëllimi ynë është të avancojmë mirëkuptimin e ndërsjellë ndaj Asociacionit të komunave me shumicë serbe”, thuhet në një përgjigje të zëdhënëses së Ambasadës Amerikane, Katherine Judd, dërguar Radios Evropa e Lirë.
Ambasada amerikane tha se SHBA pret “reflektim për miqësinë tonë të gjatë dhe mbështetjen për popullin e Kosovës”.
Shtetet e Bashkuara më herët kanë deklaruar se në diskutimin e 31 janarit janë ftuar një grup divers i liderëve të shoqërisë civile, zyrtarëve qeveritarë, liderëve politikë dhe diplomatëve.
Javën e kaluar, gjatë një intervistë dhënë për Radion Evropa e Lirë, Kurti kishte deklaruar se nuk kishte marrë ftesë për diskutimin e 31 janarit.
Më 2015, Gjykata Kushtetuese e Kosovës gjeti se Marrëveshja mbi parimet për themelimin e Asociacionit, nuk ishte në harmoni të plotë me Kushtetutën, por diplomatët perëndimorë këmbëngulin me forcë që Kosova ta pranojë.
Asociacioni i komunave me shumicë serbe parashikohet që të mbledhë rreth vetes dhjetë komuna në Kosovë të banuara me shumicë serbe: Mitrovicë e Veriut, Kllokot, Partesh, Ranillug, Graçanicë, Zveçan, Zubin Potok, Novobërdë, Leposaviq dhe Shtërpcë.
Sipas marrëveshjeve, Asociacioni ka për qëllim të përfaqësojë interesat kolektive të këtyre komunave, veçmas nga pjesa tjetër e Kosovës.
Kurti, është shprehur kundër një asociacioni njëetnik. Por SHBA-ja vazhdimisht po kërkon që Kosova të formojë Asociacionin. Më 30 janar, përmes një shkrimi autorial, dy zyrtarë të lartë amerikanë, Derek Chollet, dhe Gabriel Escobar, sërish përsëritën këtë kërkesë.
“Është mënyrë për përmirësimin e jetës së përditshme të qytetarëve, krijimin e besimit ndërmjet serbëve etnikë dhe qeverisë qendrore, sigurimin e lidhjeve më të mira ndërmjet veriut dhe pjesës tjetër të vendit, dhe krijimin e mekanizmave për serbët për pjesëmarrje më të madhe në jetën shoqërore të Kosovës”, u tha në tekstin e tyre autorial.
Shumica e shqiptarëve mendojnë se po krijohet një “shtet brenda shtetit”.
a.d. / dita
