Edhe në mungesë të dokumentit të diplomës së studimeve “Master”, mësuesit e rinj do të mund të aplikojnë për ndjekjen e praktikës së detyruar profesionale pranë shkollave publike dhe private të arsimit parauniversitar në vend. Pranimi i aplikimeve për ndjekjen e praktikës për periudhën e dytë mësimore tashmë ka nisur, teksa e gjithë procedura do të mund të zhvillohet vetëm online nëpërmjet portalit qeveritar “e-albania”.
Duke qenë se shumë prej kandidatëve që duan të aplikojnë për ndjekjen e praktikës profesionale gjatë periudhës së dytë mësimore të vitit shkollor 2022-2023, nuk e kanë marrë ende dokumentin fizik të diplomës së studimeve të nivelit të dytë “Master në fushën e Mësuesisë”, sërish ata do të mund të aplikojnë nëpërmjet portalit online për të zhvilluar praktikën gjatë tre mujorit në vijim. Për këtë kategori, autoritetet e arsimit sqarojnë se gjatë aplikimit online, ku dhe do të përzgjedhin shkollën për zhvillimin e praktikës në lëndën përkatëse, do të duhet që të ngarkojnë një vërtetim, në të cilin të jenë të specifikuara:Numri i matrikullimit, si dhe data e diplomimit për programin e ciklit të dytë master. Për të mos u përjashtuar nga aplikimi, studenti duhet t’i ketë shlyer të gjitha detyrimet ndaj fakultetit ku ka kryer studimet e nivelit të dytë.
“Aplikimi për periudhën e dytë mësimore do të mbyllet në datën 15 dhjetor, ora 24:00. Sipas procedurave të konfirmuara, aplikimi duhet të bëhet vetëm nëpërmjet portalit e-albania, në afatet e përcaktuara. Për aplikimet jashtë portalit dhe afateve nuk do të procedohet me vlerësimin e tyre. Në mungesë të pajisjes me diplomë të ciklit të dytë të studimeve, kandidati për praktikant, duhet të pajiset nga fakulteti përkatës me një vërtetim ku të specifikohet që ka shlyer të gjitha detyrimet për përfundimin e ciklit të dytë të studimeve në edukim (si dhe njohjen e gjuhës së huaj, në bazë të testimeve të njohura ndërkombëtare dhe në nivelin e specifikuar në aktet ligjore dhe nënligjore në fuqi. Kohëzgjatja e praktikës profesionale që kryhet nga praktikanti është një periudhë mësimore (3 muaj) dhe aplikimi i praktikantëve do të kryhet online nëpermjet sistemit e-albania”, sqarojnë autoritetet e dikasterit të Arsimit.
Për të bërë një aplikim të suksesshëm, kandidatët duhet tëregjistrohen vetëm në zyrën vendore të arsimit parauniversitar që i përket vendbanimit të tyre. Vendbanimi dhe planifikimi paraprak respektohen me përpikmëri nga drejtoritë e këtyre zyrave, gjatë përzgjedhjes së kandidatëve që do të mund të zhvillojnë praktikën pranë shkollave të juridiksionit të tyre. Zyrat vendore të arsimit parauniversitar mund të pranojnë kandidatë edhe nga zyrat e tjera, vetëm në ato rastet kur lënda e profilit të diplomës së aplikantit, nuk zhvillohet në shkollat në varësi të zyrës që i përket vendbanimit të kandidatit. Çdo kandidat që plotëson kushtet e përcaktuara bën aplikimin online duke plotësuar të dhënat e nevojshme të formularit dhe pret përgjigjen e miratimit ose refuzimit të aplikimit.
“Regjistrimet për ndjekjen e praktikës do të bëhen vetëm online në portalin qeveritar. Praktikantët e rinj të mësuesisë, fillimisht duhet që të identifikohen si qytetar në portalin e-albania dhe më pas të vijojnë me zgjedhjen e shërbimit të listuar, si: Aplikim për zhvillimin e praktikës profesionale (kandidatët për mësues). Më tej, do të duhet të klikoni butonin “Përdor” për të vijuar me plotësimin e të gjitha të dhënave tënevojshme të kërkuara në formular, si dhe të ngarkoni dokumentacionin e përcaktuar. Kandidatët duhet të ngarkojnë me korrektësi gjithë dokumentacionin e kërkuar, si vijon: Cv e kandidatit për praktikë profesionale, fotokopje të noterizuara të diplomave bachelor me listë notash dhe master i mësuesisë “Profesional ” ose “Shkencor” me listë notash të noterizuara, si dhe raportin mjeko-ligjor. Pasi të kryeni këto procedura duhet që të klikoni në butonin “Dërgo” për dorëzimin e aplikimit tuaj”, bëjnë me dije autoritetet e arsimit.
Personi përgjegjës nëzyrën vendore përkatëse të arsimit parauniversitar bën shqyrtimin e aplikimit të paraqitur nga secili kandidat. Aplikanti njoftohet me e-mail, në kohën që shërbimi ka përfunduar. Kohëzgjatja e praktikës profesionale që kryhet nga praktikanti është një periudhë mësimore (3 muaj). Për kandidatët që aplikojnë për Zyrën Vendore Arsimore Tiranë janë zbardhur tashmë edhe shkollat publike dhe ato private, të cilat janë të certifikuara për zhvillimin e praktikës. Listën e plotë të këtyre shkollave ku mund të ndiqni praktikën e detyruar profesionale e gjeni të detajuar në vijim të shkrimit.
Sipas kushteve të përcaktuara, kanë të drejtën për të zhvilluar praktikën profesionale të gjithë kandidatët që kanë siguruar diplomën universitare në fushën e mësuesisë sipas ligjit nr. 9741, datë 21.05.2007 “Për arsimin e lartë në Republikën e Shqipërisë”, i ndryshuar, pas hyrjes në fuqi të ligjit nr. 10 171, datë 22.10.2009 “Për profesionet e rregulluara në Republikën e Shqipërisë”, i ndryshuar. Ndryshe nga sa ka ndodhur në vitet e shkuara mësimore, për vitin shkollor 2023 dhe në vijim, ndjekja e praktikës së detyrueshme nuk është më për një vit të plotë, por ndahet në tre periudha tre mujore. Kjo me qëllim edhe shkurtimin e kohës që mësuesit duhet të presin deri në përfundim të procedurave të licencimit për ushtrimin e profesionit të rregulluar të mësuesit.
LISTAT E SHKOLLAVE KU DO TË MUND TË ZHVILLOHET PRAKTIKA PËR MËSUESIT E RINJ TË ZYRËS VENDORE TË ARSIMIT PARAUNIVERSITAR TË TIRANËS (Kliko):
