Rusia ka evakuuar më shumë se 76,000 njerëz nga zonat kufitare në rajonin perëndimor të Kursk, teksa Ukraina vazhdon të shtyjë më thellë në ofensivën e saj ndërkufitare. Agjencia shtetërore e lajmeve TASS, duke cituar një zyrtar lokal raporton se “më shumë se 76,000 njerëz janë zhvendosur përkohësisht në vende të sigurta”.
Rusia ndërkohë akuzon Ukrainën se ka shtyrë thellë brenda territorit të saj ofensivën ushtarake me qindra tanke dhe trupa të raportuara që lëvizin drejt lindjes.
Një bloger ushtarak rus pretendoi të premten se forcat ukrainase kishin kryer një inkursion të dytë në verilindje të qytetit Sumy dhe po përparonin drejt Kucherov.
Strehimore të përkohshme akomodimi janë ngritur tashmë në tetë rajone për të strehuar të evakuuarit, pasi lufta duket se po afrohet më shumë me Rusinë.
Forcat pro-Kievit hynë në rajonin jugperëndimor të Rusisë Kursk të martën në mëngjes, duke vendosur rreth 1,000 trupa dhe më shumë se dy duzina automjete të blinduara dhe tanke, sipas ushtrisë ruse.
Ky duket të jetë sulmi më i rëndësishëm ukrainas në Rusi që nga shpërthimi i luftës, me analistët që sugjerojnë se trupat e Kievit kanë avancuar deri në disa milje në Rusi.
Ndërsa Ukraina nuk e ka konfirmuar zyrtarisht ofensivën, Presidenti Volodymyr Zelensky tha të enjten se Rusia duhet të ‘ndiejë’ pasojat e pushtimit të saj.
“Rusia solli luftën në tokën tonë dhe duhet të ndjejë atë që ka bërë”, tha Zelensky, pa iu referuar drejtpërdrejt ofensivës.
Ofensiva e Ukrainës në rajonin e Kurskut duket se e ka kapur Rusinë në befasi. Instituti për Studimin e Luftës, një institut me bazë në Uashington, thotë se forcat e Kievit kanë hyrë më thellë në Kursk me ‘përparime të shpejta’, që thuhet se shkojnë deri në 20 milje përtej kufirit.
“Mungesa e një përgjigjeje koherente ruse ndaj inkursionit ukrainas në Kursk dhe shkalla e raportuar e përparimit ukrainas tregon se forcat e Kievit ishin në gjendje të arrinin befasi operacionale”, tha ISW me bazë në Uashington të enjten vonë.
i.b./dita
