Investigimi: Oligarku rus i afërt me Putinin ka financuar fshehtas dasmën e djalit të Trump

Mediat ndërkombëtare po raportojnë se dasma e Donald Trump Jr. në Bahamas u financua pjesërisht nga oligarku rus Umar Kremlev, i cili është mjaft i afërt me Vladimir Putin dhe drejton Shoqatën Ndërkombëtare të Boksit (IBA). Hulumtimi fillestar u krye nga rrjeti investigativ ProPublica:

Një hetim i rrjetit prestigjioz ProPublica zbulon se Umar Kremlev, kryetar i Shoqatës Ndërkombëtare të Boksit, pagoi qindra mijëra dollarë për ceremoninë luksoze të djalit të ish-presidentit amerikan në Bahamas.

Nga një ishull privat në Bahamas te lidhjet me Kremlin, dasma e Donald Trump Jr. me partneren e tij Bettina Anderson ka hyrë në qendër të një stuhie të re politike dhe mediatike ndërkombëtare. Sipas një investigimi të detajuar të publikuar nga rrjeti jofitimprurës i gazetarisë hulumtuese ProPublica, një pjesë e konsiderueshme e shpenzimeve të ceremonisë luksoze tri-ditore janë mbuluar nga oligarku rus Umar Kremlev.

Kremlev, i cili gëzon marrëdhënie të ngushta me presidentin rus Vladimir Putin dhe mban postin e kreut të Shoqatës Ndërkombëtare të Boksit (IBA), dyshohet se ka derdhur qindra mijëra dollarë për mbarëvajtjen e festës. Mes shpenzimeve të mbuluara prej tij përfshihen marrja me qira e një prej dy ishujve privatë ku u zhvillua festimi, spektakli i fishekzjarreve dhe shërbime të tjera logjistike.

​

Transaksionet përmes kompanive në Dubai

Sipas dokumenteve të siguruara nga gazetarët investigativë, pagesat janë kryer në mënyrë indirekte përmes një entiteti biznesi me bazë në Dubai, i lidhur me organizatën e boksit që Kremlev drejton.

Në dasmën me rreth 50 të ftuar vizitorë VIP – ku merrnin pjesë anëtarë të familjes Trump si Eric Trump dhe Jared Kushner – i pranishëm ishte vetë Umar Kremlev, i shoqëruar nga një grup i ngushtë biznesmenësh rusë.

​Kremlev, i cili në prill të këtij viti u dekorua nga Putin me “Urdhrin e Miqësisë” dhe ka qenë pjesë e delegacioneve zyrtare të Kremlinit jashtë vendit, është një figurë e sanksionuar nga Ukraina për shkak të lidhjeve të tij të ngushta me shërbimet ruse të sigurisë dhe me gjigantin shtetëror të energjisë, Gazprom.

Reagimi i Trump Jr.

Përfaqësuesit e Donald Trump Jr. nuk e kanë mohuar kontributin financiar të Kremlev, por janë përpjekur ta zbutin aspektin politik të marrëdhënies.

​Në një deklaratë zyrtare për mediat, zëdhënësi i Trump Jr. u shpreh se: “Umar është një mik personal i Don”. Sipas këtij versioni, të dy janë njohur përmes një miku të përbashkët në rrethin e gjuetisë dhe kanë lidhur miqësi mbi bazën e pasionit të përbashkët për boksin dhe aktivitetet në natyrë, duke këmbëngulur se midis tyre nuk ka asnjë marrëdhënie apo interes biznesi.

​Megjithatë, zbulimi i këtyre pagesave ka ngritur pikëpyetje të mëdha mbi ndikimin e mundshëm të qarqeve ruse pranë pushtetit në rrethin më të ngushtë familjar të kandidates presidenciale apo figurave kryesore të politikës amerikane.

Përshtati DITA nga Corriere della Sera