Policia e Shtetit nisi sot një operacion të gjerë kundër kultivimit të bimëve narkotike, në një nga zonat e cilësuara ‘të nxehta’ për dukurinë e paligjshme. Bëhet fjalë kryesisht për rajonin e thellë e me terren të vështirë të Dukagjinit, ku duket se helikopterët e Guardia di Financa kanë kapur vatra jeshile të hashashit.
Mbi 100 forca u angazhuan bashkë me agjentët kriminale dhe të antidrogës, teksa në mbrëmje u raportua se janë gjetur dhjetëra parcela, me një sasi mbi 10 mijë rrënjë kanabis sativa të mbjella e që po korren në proces, me qëllim asgjësimin.
Ndërhyrja kryesore po zhvillohet në Bajzë të Njësisë Administrative Kastrat, në Malësi të Madhe, ndërsa për momentin janë shoqëruar disa persona, por s’ka të arrestuar. Nën hetim pritet të merren edhe përfaqësuesit zyrtarë vendorë të njësive apo kryepleq, që nuk kanë raportuar për këtë aktivitet. Dyshohet se kultivimi bëhej nga një grup i mirëorganizuar kriminal, që duket se ka punësuar edhe banorë të zonës për mirëmbajtje dhe kujdes.
