Trupat e dy personave të tjerë janë gjetur në vendin ku ra orteku i borës, të dielën, në Alpet franceze, duke e çuar në gjashtë numrin e viktimave. Gjetja e viktimës së gjashtë, një burrë, u komunikua mëngjesin e sotëm nga Prokuroria e Bonneville, një nga qytetet pranë vendit të ngjarjes, sipas medias publike France 3. Disa orë më parë, ishte konfirmuar trupi i pestë, një grua 39-vjeçare, e cila iu bashkua katër vdekjeve të konfirmuara të njëjtën të dielë, pak pas ortekut.
“Falë sistemit të telefonisë celulare, ata kanë krijuar një zonë afër”, i tha në atë kohë kanalit televiziv BFMTV, Jean-Luc Mattel, nënkryetar i bashkisë së qytetit të afërt të Contamines-Montjoie, ndërsa personi i fundit i zhdukur ishte ende i kërkuar. Orteku ka ndodhur në akullnajën Armancette, në lindje të Francës, pranë kufirit italian.
Sipas informacionit të dhënë nga prefektura e rajonit Haute-Savoie, orteku ishte 500 metra i gjatë, në një rrugë “shumë të frekuentuar” për ski dhe ecje, sipas një deklarate nga Prefektura e lëshuar nga shtypi vendas. Vendi ku ka rënë bora ndodhet në masivin Mont Blanc dhe ngjarja i atribuohet rritjes së ndjeshme të temperaturave në një kohë të shkurtër.
