Numri i viktimave në Turqi dhe Siri, pas dy tërmeteve brenda disa orësh nga njëri-tjetri, mund të vazhdojë të rritet ndjeshëm, sipas Organizatës Botërore të Shëndetësisë. Më shumë se 5000 njerëz thuhet se kanë vdekur në të dy vendet, me shifrën që vazhdon të rritet, ndërkohë që vijojnë operacionet e vazhdueshme të kërkim-shpëtimit.
Tërmeti i parë, me magnitudë 7.8 ra në orët e para të mëngjesit pranë qytetit të Gaziantepit, në jug të Turqisë. Disa orë më vonë, teksa njerëzit ishin ende në kërkim të të mbijetuarve në rrënoja, pati një tërmet me përmasa të ngjashme, 100 km në veri.
Intensiteti i lëkundjeve rrëzoi gjithashtu blloqe kullash dhe ndërtesa publike në veri të Sirisë dhe u ndje deri në Qipro dhe Liban.
Epiqendra e tërmetit të parë ishte afër Gaziantepit, një qytet me më shumë se dy milionë banorë. Shumë dolën në rrugë teksa ndërtesat filluan të dridhen.
Kështjella e qytetit, e cila ka qëndruar për më shumë se 2000 vjet është dëmtuar gjithashtu rëndë. Kalaja në majë të kodrës u ndërtua gjatë Perandorisë Romake. Kohët e fundit, ajo ishte përdorur si muze.
Xhamia historike Yeni Camii, në Malatya, më shumë se 100 milje nga epiqendra u dëmtua shumë. Kupolat e saj u shembën, duke e lënë të ekspozuar ndaj qiellit të dimrit. Xhamia u shkatërrua nga një tërmet i madh në 1894 dhe pas rindërtimit u dëmtua nga një tërmet tjetër në 1964.
Ndërtesat u shndërruan në gërmadha në qytetin port mesdhetar të Iskenderun, në provincën e Hatay.
Në qytetin e Alepos, kështjella e lashtë e shkatërruar nga një dekadë lufte është dëmtuar më tej nga tërmeti. Në fshatin Besnaya – Bseineh, një bllok i madh ndërtesash rezidenciale dhe tregtare u shndërrua në rrënoja.
j.l./ dita
