Kreu i SPAK, Altin Dumani ka bërë dje një deklaratë të fortë. Ai u shpreh në sallën e Kuvendit se thuajse të gjitha bandat kriminale në vend kanë mbështetje politike.
Përballë ministrave, deputetëve dhe personaliteteve ndërkombëtarë ai u shpreh se janë shumë zyrtarë që dalin në përgjime dhe hetime, teksa një pjesë jo vetëm janë blerë nga krimi, por edhe janë bërë pjesë e organizatave kriminale.
“Thuajse në të gjitha rastet e hetimeve, ku në fokus ka qenë krimi i organizuar, kemi gjetur lidhje me zyrtarë të niveleve të ndryshme, të cilët janë korruptuar ose janë bërë edhe pjesë e grupeve të krimit të organizuar”, tha ai.
Por nëse i hymë thellë kësaj deklarate, do të thotë se uragani po afron. Deri më tani, i vetmi zyrtar i ndaluar për lidhje me krimin është ish-deputeti Jurgis Çyrbja. Ai doli i lidhur me Hajrat në Shijak, teksa ishte tërësisht në shërbim të tyre.
Por nuk kemi parë asnjë emër në Elbasan, në Shkodër, apo qytete të tjera ku ka pasur operacione nga SPAK. Madje ka pasur dhe akuza ndaj prokurorisë se ka fshehur lidhjet e bandave me politikën, siç kemi rastin e fundit të bandës së Suel Çelës, i cili dihet që ka pasur mbështetje politike.
Por dje Dumani rrëzoi të gjitha spekulimet. Ai e tha hapur se SPAK i ka emrat. Dumani i di të gjithë. Madje ai e tha se ata e dinë se kush është blerë dhe se kush është anëtar aktiv i organizatës. Kjo do të thotë se arrestimi i zyrtarëve të lidhur me bandat pritet të jetë një operacion i veçantë.
Çyrbja nuk do të jetë i vetmi, pas tij nuk është çudi që të kemi të tjerë deputetë, krerë bashkish apo ish-ministra të arrestuar. Lista me emra është gati, tani mbetet vetëm vullneti i SPAK.
