Kryesia e Partisë Demokratike të Socialistëve e presidentit të Malit të Zi, Milo Gjukanoviçit, vendosi njëzëri të ndërpresë mbështetjen për qeverinë e udhëhequr nga Dritan Abazoviç. Shkak është bërë Marrëveshja Themelore me Kishën Ortodokse Serbe, e cila u votua nga shumica e ministrave të qeverisë së Abazoviç të premten.
Partia e Gjukanovic vlerëson se qeveria ndryshoi kursin politik për të cilin ishte rënë dakord dhe tha se marrëveshja me Kishën Serbe kërcënon interesat shtetërore të Malit të Zi.
“Qeveria braktisi detyrën prioritare të përmbushjes së detyrimeve nga agjenda e integrimit evropian dhe me nxitim, në mënyrë të papërgjegjshme dhe pa u konsultuar me publikun, bëri marrëveshje me Kishën Ortodokse, duke i shkaktuar dëm të pallogaritshëm interesave shtetërore të Malit të Zi.”
Partia e Gjukanoviç ka 29 deputetë në Kuvendin e Malit të zi dhe është forca kryesore politike që ka mbështetur qeverinë e pakicës së Abazoviç, pa pasur ministra në të. Kryeministri reagoi në Twitter lidhur me vendimin.
“E mirëpres vendimin e kryesisë së PDS-së. Do të shohim se cili do të jetë qëndrimi i shumicës së deputetëve. Mali i Zi duhet të ecë përpara. Krimi, korrupsioni dhe nacionalizmi nuk janë opsione. E ardhmja evropiane do të fitojë”, u shpreh ai.
Abazoviç nisi dhe zbatoi procedurën me të cilën u miratua teksti i Marrëveshjes themelore me Kishën Ortodokse Serbe përkundër paralajmërimeve nga partitë partnere në pushtet dhe një pjesë të partive të pakicës për dëmin që marrëveshja iu bënte interesave të Malit të Zi.
Gjatë diskutimit në qeveri, Abazoviç ka pranuar se pjesë e Marrëveshjes Themelore nuk janë harmonizuar plotësisht me ligjet dhe Kushtetutën e Malit të Zi, por ka insistuar në miratimin e saj. Mosmarrëveshjet mes shtetit të Malit të Zi dhe Kishës Ortodokse Serbe filluan që në vitin 2006 me pavarësinë e këtij shteti.
Kisha Ortodokse Serbe, sipas analistëve, mbetet nën ndikimin e politikës së Beogradit dhe të Moskës.
