Patriarku i Rusisë deklaron se i janë mbyllur dyert e hyrjes në BE

BE i ka ndaluar hyrjen Patriarkut të Moskës.

“Është marrë një vendim i paprecedentë: të mos lejohet patriarku në territorin e Bashkimit Evropian. Kjo nuk ka ndodhur as gjatë Luftës së Ftohtë”, tha primati i Kishës Ortodokse Ruse.

Ai beson se BE-ja ka frikë të angazhohet në dialog.  “Ata kanë frikë, pasi e drejta është në anën tonë, jo te tyren.  Ne jemi të hapur për komunikim me ata që na duan dhe ata që nuk na duan”, shtoi Patriarku i Moskës dhe gjithë Rusisë Kirill.

Sipas patriarkut, në Asamblenë e Përgjithshme të Këshillit Botëror të Kishave në Karlsruhe, presidenti gjerman Frank-Walter Steinmeier “ushtroi presion” mbi asamblenë dhe delegacionin e Kishës Ortodokse Ruse. “Kjo është një ndërhyrje e paprecedentë e autoriteteve laike në jetën e organizatave kishtare. Reagova me mirëkuptim dhe mirënjohje ndaj qëndrimit të Asamblesë së WCC, i cili nuk ishte dakord me zotin Steinmeier”, tha primati i Kishës Ortodokse Ruse.

Asambleja e WCC u mbajt në Karlsruhe, Gjermani, nga 31 gusht deri më 8 shtator. Në asamble mori pjesë një delegacion i Kishës Ortodokse Ruse, i kryesuar nga kryetari i Departamentit për Marrëdhëniet e Jashtme të Kishës, Mitropoliti Anthony i Volokolamsk. Tema e asamblesë së këtij viti është “Dashuria e Krishtit e shtyn botën drejt pajtimit dhe unitetit”.

Më 27 korrik, autoritetet lituaneze i ndaluan hyrjen Patriarkut Kirill, i cili, sipas Ministrisë së Jashtme lituaneze, “mohon qëllimisht integritetin territorial dhe sovranitetin e Ukrainës”, dhe gjithashtu “justifikon dhe mbështet veprimet agresive të Rusisë, duke shkelur rëndë normat dhe parimet e së drejtës ndërkombëtare”. Britania e Madhe ishte e para që e sanksionoi patriarkun dhe më vonë edhe Kanadaja e futi në listën e zezë.