Një revistë gjermane është kritikuar ashpër pasi reklamoi një “intervistë ekskluzive” me Michael Schumacher, për të zbuluar më pas se ishin citime të kampionit gjerman të Formula 1 duke përdorur inteligjencën artificiale.
Shumë pak dihet nga gjendja shëndetësore e Michael Schumacher që kur në dhjetor të vitit 2013 pësoi një aksident me ski dhe u fut në koma të induktuar. Që atë ditë, gjermani nuk është shfaqur më në publik.
Ish-piloti i Ferrarit, i cili ka fituar 7 tituj kampion në F1, vijon të mbetet nën kujdesin e një ekipi mjekësor dhe gruas së tij Corinna, në shtëpinë e tij në Gjenevë. Për këtë arsye, të gjithë u habitën kur revista gjermane “Die Aktuelle” njoftoi se do të publikonte “intervistë ekskluzive” me të.
Në fund të artikullit, revista pranon se citimet janë të rreme dhe se nuk ka folur me Schumacher apo dikë nga familja e tij: “Intervista ishte online, në një faqe që ka të bëjë me inteligjencën artificiale”.
Menjëherë, fansat dhe ekspertët e komunikimit dënuan artikullin, duke e cilësuar “të turpshëm”.
Gruaja e tij, Corinna Schumacher, kurrë nuk ka dhënë detaje për situatën e kampionit legjendar, por në një dokumentar për të, në vitin 2022, tha:
“Michael është këtu. I ndryshuar, por këtu. Kjo gjë na jep forcë. Jemi bashkë të gjithë, jetojmë bashkë të gjithë. Bëjmë terapi dhe çdo gjë që ta përmirësojmë Michaelin dhe ta bëjmë të ndihet mirë.
Michael thonte gjithmonë që gjërat private duhet të mbeten private. Është e rëndësishme për mua që ai të vazhdojë ta shijojë privatësinë e tij. Michael gjithmonë na mbronte neve dhe tani jemi ne ata që po mbrojmë Michael”.
m.b./dita
