Një aksident ka ndodhur këtë të premte në fshatin Drenovicë, të bashkisë Dimal, ku një motor ka goditur një vajzë 5-vjeçe, që ishte duke kaluar nga njëra anë e rrugës në tjetrën.
Pas aksidentit, drejtuesi i motorit që është edhe komshi me familjen e vajzës që aksidentoi, e ka transportuar fëmijën në Spitalin e Beratit me një makinë të rastit. Vajza me inicialet A.D, ndodhet tashmë nën kujdesin e mjekëve dhe jashtë rrezikut për jetën.
Drejtuesi i motorit është vetëdorëzuar në polici, ku edhe po pyetet në lidhje me aksidentin.
Burimet policore bëjnë me dije se motomjeti nuk ka qenë me shpejtësi dhe nga testi i alkoolit ka rezultuar se drejtuesi i mjetit nuk kishte konsumuar pije alkoolike.
