Në kuadër të një operacioni të zhvilluar nga Departamenti Special i Policisë së Malit të Zi, është vënë në pranga Dejan Knezheviç, zv/drejtor i Drejtorisë së Policisë për Luftën kundër Krimit të Organizuar. Mediat malazeze shkruajnë se Knezheviç akuzohet se është pjesë e një grupi të strukturuar kriminal.
Informacioni për arrestimin e Knezheviç është konfirmuar edhe nga zëdhënësi i Prokurorisë Speciale të Shtetit, Vukas Radonjiç.
“Në vazhdimësi të aksionit që Departamenti Special i Policisë ndërmerr së bashku me Prokurorinë Speciale të Shtetit, dhe në bazë të hetimeve disa mujore dhe koordinimit mes të Prokurorisë Speciale të Shtetit, Departamentit të Policisë Speciale dhe Agjencisë së Bashkimit Evropian për Bashkëpunim të Organeve të Ligjit – Europol, sot është privuar nga liria, ushtruesi i detyrës së ndihmësdrejtorit të Drejtorisë së Policisë për Sektorin Kundër Krimit, D.K., nën dyshimin se ka kryer veprën penale të krijimit të një organizatë kriminale dhe vepra të tjera penale”– tha Radonjiç, duke theksuar se Prokuroria Speciale e Shtetit pritet të japë më tepër detaje në orët në vijim.
- Publicitet -
Një deklaratë e ka bërë edhe Administrata e Policisë së Malit të Zi.
“Sot është nga privuar liria ushtruesi i detyrës së ndihmës drejtorit të Drejtorisë së Policisë për Sektorin Kundër Krimit, Dejan Knezheviç. Duke pasur parasysh fazën e procedurës, pra kufizimet ligjore, nuk mund të bëhen të ditura detaje të mëtejshme. Policia po bashkëpunon dhe po vepron me urdhër të Prokurorisë Speciale të Shtetit për këtë rast”, thuhet në njoftimin e policisë.
Dejan Knezheviç është punonjës dhe funksionar i vjetër i Drejtorisë së Policisë. Më parë ka drejtuar Departamentin për Luftën kundër Drogës. Ai u emërua Ndihmës Drejtor i Drejtorisë së Policisë për Krimin e Organizuar në fillim të marsit 2021. Mandati i tij në atë detyrë iu zgjat vetëm disa javë më parë.
Ky operacion zhvillohet vetëm pak ditë pasi Policia e Malit të Zi vuri në pranga pesë persona, pjesë të grupit kriminal Kavaçi, të kryesuar nga Radoje Zvicer.
Të arrestuarit janë: ish-komandanti i policisë së Podgoricës, Ivan Stamatoviç, ish-oficeri special i policisë Vladimir Bajçeta (ish-truproja e Dushko Shariçit, vëllait të kreut të kartelit ballkanik të drogës, Darko Shariçit), polici Milan Popoviç, Tihomir Adžić nga Podgorica. Nuk dihet nëse dhe zëvendësdrejtori që u kap sot, ka lidhje me të njëjtin klan.
