Atentati misterioz në Garunjas të Lushnjës pasditen e së enjtes, fill pas procesit gjyqësor për pronat mes dy familjeve në fis, ende nuk ka një autor në pranga, por të dyshuar. Shaip Hasalla, i ati i autorit të shpallur në kërkim Armand Hasalla, si i dyshuar për plagosjen e Bajame Sejenas ka mohuar që djali i tij të jetë i përfshirë. Ashtu si dhe i biri tjetër nga Italia, në një prononcim për media, i moshuari mohoi që djali i tij të kishte lidhje me plagosjen, ndërsa shtoi se Armand Hasalla është prej dy javësh në Greqi. Shaipi këmbëngul se e gjitha të jetë e inskenuar nga vetë familja tjetër, me qëllime të caktuara.
“Unë s’di gjë fare në lidhje me ngjarjen. S’janë këtu, Armando është në Greqi, kurse Laerti ka ikur dy ditë më parë në Itali tek vjehrri me gjithë familjen e tij. Policia na mori në telefon dje se ku ishim. Dje ishim në gjyq për tokën dhe për djalin që na kanë vrarë. Sapo mbaruam gjyqin, na erdhën në shtëpi dhe na thanë keni vrarë. Por ne nuk dimë gjë, më mori djali në telefon dhe më pyeti çfarë ka ndodhur. Nuk e di pse na akuzojnë ne. Autorët që më vranë djalin janë dënuar. Kastrioti është dënuar me 35 vjet burg, Afrim Hasalla 2 vjet, Marjusi 1 vit e gjashtë muaj. Brahimi është dënuar 2 mijë lekë. Ky ishte vendimi i gjyqit dje. Nuk kemi asnjë lloj konflikti kemi parë punën tonë, ja kam lënë drejtësisë këtë punë. Kjo për mendimin tim është një ngjarje e sajuar nga ana e tyre. Duan të hakmerren. Ne ndihemi të rrezikuar”, tha ai.
Persona ende të panjohur qëlluan me armë dy mjetet në kthim në Garunjas, ku u plagos në këmbë Bajame Sejena, motra e Kastriot Hasallës, i dënuar me 35 vite burgim për vrasjen e kushëririt të tij, Romeo Hasalla, pikërisht për shkak të pronësisë së 2 hektarëve tokë. Afrim Hasalla akuzoi për këtë atentat vëllanë e Romeo Hasallës, Laertin, që nga ana tjetër tha se prej ditësh ndodhet në Itali. Policia kreu kontrolle në shtëpinë e Laert Hasallës por nuk ka gjetur gjë.
