Një i shumëkërkuar nga drejtësia italiane u kap në aeroportin e Rinasit. Rexhep Rapi, i njohur edhe si ‘Kep Rapi’, ka rënë në prangat e policisë këtë të premte. 60-vjeçari është i dënuar me 7 vjet burg, për organizimin e emigracionit të paligjshëm. Shërbimet e Policisë Kufitare Rinas njoftuan se në dokumente i dyshuari mbante edhe identitetin Rexhep Rapi (Arapi), banues në Durrës, i cili pas verifikimit nga Interpol Tirana ka rezultuar person i shpallur në kërkim ndërkombëtar. Gjykata e Apelit Genova, e ka dënuar në mungesë me 7 vjet burgim, për veprën penale “organizimi i emigracionit të paligjshëm”, nga të cilat i kanë mbetur për të vuajtur dhe 4 vjet. Interpol Tirana vijon procedurat për ekstradimin e tij drejt Italisë. Rapi ka qenë i arrestuar edhe në vitin 2021 në Durrës, pasi i gjetën armë në lokalin e tij. Rapi lëvizte me mjet të blinduar tip “Benz”, i cili i është sekuestruar bashkë me një pistoletë, që iu gjet në një çantë në banakun e lokalit. Gjithashtu ka precedentë të tjerë, kundër jetës së personit dhe në fushën e narkotikëve.
