Pas Covid 19-tës që gjunjëzoi botën, pandemia e ardhshme do na trokasë në derë, e këtë herë, sipas kreut të OBSH-së, duhet të na gjejë të përgatitur.
Nga Asambleja e Përgjithshme vjetore e organizatës së shëndetësisë, Tedros Ghebreyesus deklaroi se është koha të shpejtojmë negociatat që synojnë parandalimin e një situate të ngjashme në të ardhmen.
“Ne nuk mund ta shtyjmë më këtë gjë. Pandemia e ardhshme është gati të na trokasë në derë. Nëse nuk i bëjmë ne ndryshimet e nevojitura, atëherë kush do t`i bëjë? Dhe nëse nuk veprojmë tani, kur do ta hedhim këtë hap”, u shpreh kreu i OBSH-së Tedros Adhanom Ghebreyesus.
Takimi dhjetëditor i OBSH-së përkon me 75-vjetorin e saj dhe fokusohet tek diskutimet mbi çështjet globale të shëndetit, duke përfshirë pandemitë e ardhshme. 194 shtetet anëtare të OBSH-së po negociojnë aktualisht reformat e rregullave detyruese që do të përcaktojnë sesi duhet vepruar në rastin e një kërcënimi ndërkombëtar shëndetësor dhe po hartojnë gjithashtu një traktat më të gjerë pandemik, i cili do të ratifikohet vitin e ardhshëm.
“Një angazhim nga kjo gjeneratë (për një marrëveshje pandemike) është i rëndësishëm, sepse është ky brez që përjetoi se sa i tmerrshëm mund të ishte një virus i vogël,” tha Ghebreysus. Vendet gjithashtu do të marrin në konsideratë buxhetin e OBSH-së 2024-2025, i cili përfshin rritje të tarifave vjetore të anëtareve.
o.j/dita
