ChatGPT, programi i inteligjencës artificiale me rritje të shpejtë, ka tërhequr shumë vlerësime për aftësinë e tij për të dhënë përgjigjet brenda një kohe shumë të shkurtër për një gamë të gjerë pyetjesh. Në të njëjtën kohë ka shkaktuar shqetësime tek politikanët amerikanë të cilët ngrenë pyetje rreth ndikimit të tij në sigurinë kombëtare dhe arsim.
ChatGPT mendohet të ketë arritur 100 milionë përdorues aktivë mujorë vetëm dy muaj pas lançimit, duke e bërë atë aplikacionin konsumator me rritjen më të shpejtë në histori dhe një objektiv në rritje për rregullim të mëtejshëm.
Ai u krijua nga OpenAI, një kompani private e mbështetur nga Microsoft Corp, dhe u vu në dispozicion të publikut falas. Kudondodhja e tij ka krijuar frikë se Inteligjenca Artificiale gjeneruese si ChatGPT mund të përdoret për të përhapur dezinformata, ndërsa edukatorët shqetësohen se do të përdoret nga studentët për të kopjuar në teste të rëndësishme, por dhe në punimet e tyre.
Përfaqësuesi Ted Lieu, një demokrat në Komitetin e Shkencës të Dhomës së Përfaqësuesve, u shpreh në një artikull për në Neë York Times se ai ishte i emocionuar për Inteligjencën Artificiale dhe mënyrat e pabesueshme me të cilat ajo do të vazhdojë të avancojë shoqërinë. Por ai shtoi se gjithashtu ndihet i trembur pasi Inteligjenca Artificiale është lënë e pakontrolluar dhe pa rregulla. Lieu prezantoi një rezolutë të shkruar nga ChatGPT në të cilën thuhej se Kongresi duhet të fokusohet tek Inteligjenca Artficiale për të bërë që zhvillimi dhe vendosja e saj, të bëhet në një mënyrë që është e sigurt, etike dhe respekton të drejtat dhe privatësinë e të gjithë amerikanëve, dhe se përfitimet e Inteligjenës artificiale të jenë të shpërndara gjerësisht ndërsa rreziqet të minimizohen.
Në janar, CEO i OpenAI Sam Altman shkoi në Capitol Hill ku u takua me ligjvënës të orientuar nga teknologjia. Nj ënga ndihmësit e kongresmenëve demokratë që ishin të pranishëm në këtë takim i kërkoi Altman që ta siguronte se Inteligjenca Artificiale nuk përfshin paragjykime që do të çonin në diskriminim në botën reale, për sektorë si strehimi ose vendet e punës. Gjithashtu u diskutua dhe për shpejtësinë e ndryshimeve të saj dhe se si mund të përdoret.
OpenAI theksoi se nuk do që ChatGPT të përdoret për qëllime mashtruese në shkolla ose kudo tjetër, kështu që po zhvillohen masa zbutëse për të ndihmuar këdo që të identifikojë tekstin e krijuar nga ai sistem. Në një intervistë me Time, Mira Murati, shefe e teknologjisë e OpenAI, tha se kompania mirëpriti kërkesat nga rregullatorët dhe qeveria.
o.j/dita
