Porti në Porto Romano, Rama: Kompania u tërhoq për shkak të krizës, emaili amerikan koincidencë

Tërheqjen e kompanisë Archirodon nga tenderi i portit të ri në Porto-Romano, Kryeministri Rama e përjashton se është ndikuar nga ndonjë presion i jashtëm. E vetmja arsye thotë është rritja e kostove. Rama thotë se ka pasur presion nga forca që nuk e duan që Shqipëria të ketë një port nyje lidhëse të Korridorit VIII por nuk do ia dalin.

“Ka ndodhur një koicidencë e pashmangshme, që në momentin e fundit kompania është tërhequr duke iu referuar situatës së krizës dhe natyrisht që duke qenë se oferta financiare do të ishte e lidhur me tavanin që ka vendosur studimi nga kompania më e madhe e botës.

Argumenti i kompanisë për kostot financiare tingëlloi jo bindës pasi konsorciumi kishte kërkuar në janar zgjatje të afatit deri më 9 mars për të paraqitur një ofertë teknike dhe tregtare gjithëpërfshirëse.

Pak ditë më parë, një email dërguar autoriteteve shqiptare, përfshirë kryeministrin Rama, nga presidenti i Dhomës Amerikane të Tregtisë Grant Van Cleve, ngrinte shqetësime serioze lidhur me përmasat dhe kapacitetet përpunuese të portit të ri dhe kërkonte kryeministri Edi Rama bllokimin e procedurës së tenderimit. Megjithatë, Rama tha se nuk ka pasur një presion nga SHBA apo BE, por nga faktorë të painteresuar, të cilët refuzoi t’i evidentonte me emra.