Komisioni i Posaçëm i Apelit la në fuqi vendimin e marrë në 16 qershor të vitit 2020, nga Komisioni i Pavarur i Kualifikimit, për shkarkimin e prokurorit Blerim Tominaj. Magjistrati u shkarkua nga detyra për mosdeklarimin e 3,6 milionë lekëve në vitet 2011, 2012 dhe 2013. Tominaj njihet si prokurori i dosjes që çoi në pranga grupin kriminal “Bajri”. Tominaj u vu më 20 shtator 2018 në hetim disiplinor, si prokurori ‘rebel’ që refuzoi të ishte pjesë e shortit për të zëvendësuar Eneid Nakuçin dhe Elisabeta Imerajn, në dosjen ndaj Emiljano Shullazit.
Blerim Tominaj e nisi karrierën në sistemin e drejtësisë në vitin 1993 dhe punoi për më shumë se një dekadë si prokuror në Prokurorinë e Tiranës. Në vitin 2014, u emërua zv/drejtues i Prokurorisë së Krimeve të Rënda dhe vazhdoi të punonte në këtë prokurori, deri në shkrirjen e saj në dhjetor të vitit 2019.
