Projektligji: Mjekët do të mund të punojnë privatisht në shtet pas orarit zyrtar të punës

Mjekët e spitaleve publike do të mund të punojnë privatisht në këto struktura, edhe pas përfundimit të orarit zyrtar të punës. Për të shmangur largimin e bluzave të bardha drejt strukturave private, apo edhe jashtë vendit (një fenomen ky tejet shqetësues gjatë viteve të fundit), në draftin e ri ligjor të përgatitur për shërbimin spitalor, dikasteri i Shëndetësisë ka përfshirë edhe këtë risi.

Në këto kushte, mjekët e spitaleve publike do të mund të vijojnë të ushtrojnë profesionin e tyre privatisht po në ambientet e spitalit publik, edhe pasi të kenë përfunduar orarin e tyre zyrtar të punës. Tarifat dhe modalitetet se si do të organizohet puna në këto raste do të përcaktohet nga dikasteri i Shëndetësisë.

Konfirmimi është bërë gjatë ditës së djeshme nga vetë ministrja e Shëndetësisë dhe Mbrojtjes Sociale, Ogerta Manastirli, e cila ka prezantuar në mbledhjen e Komisionit Parlamentar të Shëndetësisë dhe Çështjeve Sociale draftin e ri ligjor për spitalet, hartimi i të cilit vjen pas 18 viteve nga zbatimi i ligjit aktual. Nisma e re ligjore e dikasterit të Shëndetësisë synon që institucionet spitalore të fitojnë autonominë e duhur, duke i lejuar kështu që të menaxhojnë vetë  buxhetet e tyre, si dhe të gjejnë mundësi për t’i vetëfinancuar shërbimet brenda spitalit.  Gjatë diskutimeve të zhvilluara në mbledhjen e komisionit, ministrja Manastirli, tha se ligji u krijon mundësi mjekëve të punojnë privatisht në spital përtej orarit të punës, kostot dhe tarifat për konsultat jashtë sistemit të referimit do të miratohen nga Ministria e Shëndetësisë.

“Kjo do të sjellë që ne t’i kemi mjekët më shumë brenda spitaleve tona për t’u kujdesur shumë më shumë për pacientët, edhe përtej kohës së punës. Nga ana tjetër kjo risi do të krijojë për pacientët që duan të kenë konsulta ambulatore jashtë sistemit të referimit, një akses më të drejtpërdrejt në shërbime. Dhe sigurisht kjo bazuar në kosto dhe tarifa të miratuara, sipas të metodologjive që parashikon ligji dhe që ne jemi duke i punuar në vijim të akteve nënligjore që do të dalin menjëherë pas miratimit nga Kuvendi i Shqipërisë të ligjit të ri për kujdesin spitalor”, ka vënë në dukje ministrja e Shëndetësisë, Ogerta Manastirliu.

Sipas skemës së përcaktuar, zbatimi i modelit të ri të autonomisë spitalore fillimisht do të aplikohet  në Spitalin Memorial të Fierit, për t’u shtrirë më pas në të gjitha spitalet e tjera të vendit. Ndërkohë që për të qenë pjesë e modelit të ri të financimit të gjitha spitalet do të duhet të kenë kaluar edhe procesin e akreditimit dhe vlerësimit të cilësisë së shërbimeve që ofrojnë për pacientët.

Kundrejt autonomisë spitalore ministrja Manastirliu shtoi më tej se:“Ligji parashikon risi, duke futur konceptin e ri të modelit të autonomisë spitalore. Një model i cili parashikon të krijojë dy nënmodele: modelin e autonomisë spitalore menaxheriale dhe modelin e autonomisë spitalore financiare, nëpërmjet një instrumenti që e kemi quajtur “Kartën e autonomisë spitalore”. Kjo do të bëjë të mundur që spitalet, të cilat janë të përgatitura me burimet njerëzore, të administrojnë në një tjetër nivel qoftë buxhetet e alokuara, por edhe të kenë mundësi të krijojnë mënyra të reja për të vetëfinancuar spitalet, nëpërmjet marrëveshjeve me të tretët”.

Nëpërmjet këtyre ndryshimeve do të bëhet e mundur edhe arritja e një planifikimi kombëtar spitalor. Kjo pasi deri më tani në vend kemi pasur vetëm spitalet bashkiake, spitalet rajonale dhe spitalet terciare. Me zbatimin e ligjit të ndryshuar do të përfshihen edhe koncepte të reja sikurse është spitali ditor dhe gjithashtu spitalet mbi baza rajoni, pra spitale që i shërbejnë jo vetëm qarkut, por gjithë rajonit.

“Një risi e këtij projektligji të ri është planifikimi spitalor në nivel kombëtar. Për këtë, është parashikuar ngritja e një organi kolegjial ad-hoc, një organ këshillimor për politikat dhe zhvillimin e sistemit shëndetësor, që do të hartojë planin kombëtar spitalor”, shtoi ministrja Manastirliu.

Një tjetër pikë e rëndësishme e draftit të ri do të jetë edhe ndarja e pagesave për mjekët në bazë të punës së kryer prej tyre. Kështu, autonomia spitalore do të mundësojë edhe pagesat e diferencuara për mjekët në bazë të performancës dhe shërbimit të ofruar për qytetarët, si dhe do të lejojë praktikat e dyfishta të mjekëve, që do të thotë edhe mundësi për të shfrytëzuar mjediset spitalore për konsulta apo shërbime përtej orarit të punës, për pacientë jashtë sistemit të referimit. Projektligji i ri i hartuar për “Shërbimin spitalor në Republikën e Shqipërisë”, vjen pas 18 vitesh nga ligji i spitaleve që është në fuqi.

Vlerësimi i cilësisë në spitale

Lidhur me vlerësimin e cilësisë në strukturat shëndetësore, pak ditë më parë është ngritur dhe ka nisur punën Agjencia e re e Sigurimit të Cilësisë dhe Kujdesit Shëndetësor dhe Shoqëror, një institucion që ka mekanizmat për të monitoruar dhe akredituar strukturat e ofrimit të shërbimit shëndetësor dhe shoqëror, publike dhe jopublike, si dhe për certifikimin e edukimit në vazhdim të profesionistëve shëndetësorë dhe shoqërorë.

Në raport me cilësinë çdo institucion shëndetësor, spital, qendër shëndetësore, klinikë, farmaci, klinikë stomatologjike do të kalojë në vlerësim për shërbimet e ofruara, ku nuk do të tolerohet asnjë strukturë shëndetësore dhe shoqërore t’i shmanget procesit të akreditimit.

Agjencia e re e Sigurimit të Cilësisë dhe Kujdesit Shëndetësor dhe Shoqëror, që bashkon dy institucione, atë të edukimit në vazhdim dhe të akreditimit, do të akreditojë dhe mbikëqyrë aktivitetet dhe ofruesit (institucionet dhe organizatat) e edukimit në vazhdim për profesionistët e shëndetësisë sipas standardeve, kritereve dhe procedurave të përcaktuara si dhe do të akreditojë institucionet shëndetësore dhe shoqërore që plotësojnë standardet, me synim garantimin e cilësisë së shërbimit për qytetarët. Aktualisht janë 36 institucione shëndetësore të akredituara (19 institucione publike dhe 17 institucione jopublike); 93 Institucione shëndetësore në proces akreditimi, 680 klinika private/qendra mjekësore të ftuara për të marrë pjesë në procesin e akreditimit.